நாம் ஏன் பிறந்தோம்?

நமது வாழ்வு.... நோக்கம் கொண்டதா? நோக்கமற்றதா?

இன்று நாம் உயிருடன் இருப்பது எந்த அளவிற்கு உண்மையோ அது போலவே என்றேனும் ஒரு நாள் மரணிப்போம் என்பதும் உண்மையே! அப்படியெனில், நம் வாழ்வும் மரணமும் எதற்காக? இவ்விரண்டின் பிண்ணனியில் ஏதேனும் காரணங்கள் உள்ளனவா ?

இக்கேள்விக்கான விடையை வேறெங்கும் தேடவேண்டியதில்லை.... நம்மைச் சுற்றி நடப்பவற்றை சற்று ஆராய்ந்தாலே போதும். இதோ, நமது சுற்றி  நடைபெறும் விஷயங்களை சற்று பாருங்கள்... இரவு பகல் மாற்றம், மழை, விளைச்சல், சாலையில் பேருந்துகள் ஓட்டம், நம் உடலின் இயக்கம்... இவற்றில் எதுவும் காரணமின்றி நடைபெறுகிறதா?  இல்லைதானே.... ஒவ்வொரு நிகழ்விற்கும் காரணம் உண்டு, ஒவ்வொரு செயலுக்கும் அர்த்தமுண்டு என்று நாம் காணும்போது மனித இனமும் காரணமின்றியோ நோக்கமின்றியோ படைக்கப்படவில்லை என்றல்லவா பகுத்தறிவு நமக்குச் சொல்கிறது? சரி, அந்த நோக்கம்தான் என்ன? அதைப் பற்றி நாம் கவலைப்படாமல் இருக்க முடியுமா?

இங்கு எந்த மனிதரும் தனது சுய விருப்பத்தினால் பிறப்பதோ அல்லது இறப்பதோ இல்லை என்பது தெளிவு. இது நமக்கு அப்பாற்பட்ட ஒரு அறிவார்ந்த சர்வவல்லமை கொண்ட அளவிடமுடியாத சக்தி இருப்பதை நமக்கு உறுதிப்படுத்துகிறது. அந்த சக்தியே நம்மையும் நம்மைச்சுற்றி உள்ள அனைத்தயும் படைத்து பரிபாலித்து வருகிறது. நம்மை மரணிக்கச் செய்வதும் அதுவே! அந்த சக்தியையே நாம் தமிழில் இறைவன் என்கிறோம். அவனையே ஆங்கிலத்தில் ‘காட்’ என்றும் அரபு மொழியில் ‘அல்லாஹ்’ என்றும் அழைக்கிறோம்.

அந்த இறைவன் இவ்வுலக வாழ்வின் நோக்கம் என்ன என்பதைப பற்றி அறிவித்துத் தந்தால் அதுவே உண்மையாகும். மற்றவை அனைத்தும் ஊகங்களாகும். நம் வாழ்வின் நோக்கம் பற்றி இறைவன் தனது வேதங்கள் மூலமாகவும் தூதர்கள் மூலமாகவும் மனிதகுலத்துக்கு அறிவித்து வந்துள்ளான். இந்தத் தூதர்கள் மனிதகுலம் தோன்றிய நாள் முதற்கொண்டு பல்வேறு காலகட்டங்களில் பூமியின் பல்வேறு பாகங்களுக்கும் வந்துள்ளனர். இவர்கள் இஸ்லாமிய வழக்கில் நபிமார்கள் என்று அழைக்கப்படுகின்றனர். பண்டைய இந்தியாவில் இவர்களையே  "ரிஷிகள்"  என்று அழைத்தார்கள். அவர்கள் அனைவரும் அடிப்படையில் ஒரே செய்தியைத்தான் தத்தமது மக்களுக்கு தெரிவித்தனர், இறைதூதர்களின் வரிசையில் இறுதியாக வந்ததவர்தான் முஹம்மது நபி (அல்) அவர்கள். அவர் மூலமாக அருளப்பட்ட வேதம்தான் திருக்குர்ஆன் என்பது.

ஏன் திருக்குர்ஆனைப் பின்பற்றவேண்டும்?

திருக்குர்ஆன் என்பது இன்று வாழும் மக்களுக்காக இறுதியாக வந்துள்ள வேதமாகும். இதற்கு முன்னர் இறைவனிடம் இருந்து பல நாடுகளில் வாழ்ந்த தூதர்கள் மூலமாக வெவ்வேறு வேதங்கள் வந்திருந்தாலும் அவை அனைத்தும் இன்று சிதைந்த நிலையிலேயே காணப்படுகின்றன. மேலும் அவை அந்த குறிப்பிட்ட காலகட்டத்தில் ஒரு குறிப்பிட்ட மக்களுக்காக அருளப்பட்டிருந்தன. ஆனால் திருக்குர்ஆன் என்பது இனி இறுதிநாள் வரையும் வரவிருக்கின்ற மக்களுக்கும் வழிகாட்டியாக இருப்பதால் அது எந்த மாற்றங்களுக்கோ சிதைவுகளுக்கோ இடம்கொடாமல் நிலைத்து நிற்கிறது. சுமார் 1430 வருடங்கள் ஆகியும் அது இன்றும் நபிகள் நாயகம் அவர்களுக்கு அருளப்பட்ட அதே நிலையில் அதே மொழியில் உலகெங்கும் உலா வருகிறது. இதைப்பற்றி இறைவனே கூறுவதைக் கேளுங்கள்:

15:9. நிச்சயமாக நாம் தான் (நினைவூட்டும்) இவ்வேதத்தை (உம்மீது) இறக்கி வைத்தோம்; நிச்சயமாக நாமே அதன் பாதுகாவலனாகவும் இருக்கின்றோம்.

மேலும் சந்தேகத்துக்கு இடம்கொடாத மிக உறுதியான மொழிகளில் இறைவன் இதன்மூலம் பேசுவதை நீங்கள் பார்க்கலாம்:

2:2. இது, (இறைவனின்) திரு வேதமாகும்;, இதில் எத்தகைய சந்தேகமும் இல்லை, பயபக்தியுடையோருக்கு (இது) நேர்வழிகாட்டியாகும்.

45:2. இவ்வேதம், யாவரையும் மிகைத்தோனும் ஞானம் மிக்கோனுமாகிய இறைவனிடமிருந்தே இறக்கியருளப்பட்டது.

தனது புத்தகம் சந்தேகங்களுக்கு அப்பாற்பட்டது என்று அறைகூவல் விடுக்கும் பாணியில் இருந்தே இது இறைவனின் வார்த்தைகளே என்பதை அறியலாம். அப்படிப்பட்ட தெளிவான இறைவேதம் மனித வாழ்க்கையைப் பற்றி என்ன கூறுகிறது என்பதை அறிவோம் வாருங்கள்....

வாழ்க்கையின் நோக்கம்

அந்த திருக்குர்ஆனில் இறைவன் இவ்வாறு கூறுகிறான்:

67:2. உங்களில் எவர் செயல்களால் மிகவும் அழகானவர் என்பதைச் சோதிப்பதற்காக அவன், மரணத்தையும் வாழ்வையும் படைத்தான்; மேலும், அவன் (யாவரையும்) மிகைத்தவன்; மிக மன்னிப்பவன்.

18:7. (மனிதர்களில்) அழகிய செயலுடையவர்கள் யார் என்று அவர்களைச் சோதிப்பதற்காக, நிச்சயமாக பூமியிலுள்ளவற்றை அதற்கு அலங்காரமாக நாம் ஆக்கினோம்.

ஆம், அன்பு சகோதர, சகோதரிகளே...  இந்த தற்காலிக வாழ்க்கை என்பது ஒரு தேர்வு எனவும் இவ்வுலகம் என்பது அதற்கான தேர்வுக்கூடம் எனவும் மேற்படி இறைவசனங்களில் இருந்து தெளிவாகிறது. இங்கு இறைவன் எதையெல்லாம் நம்மிடம் செய் என்று சொல்கிறானோ அவையே நன்மை அல்லது புண்ணியம் என்றும் எவற்றையெல்லாம் செய்யாதே என்று தடுக்கிறானோ அவையே தீமை அல்லது பாவம் என்றும் நாம் புரிந்து கொள்ளவேண்டும். அந்த அடிப்படையில் நமது செயல்பாடுகள் புண்ணியங்களாகவும் பாவங்களாகவும் பதிவாகும் பரீட்சைகளமே இவ்வுலகம்.  அதில் நாம் வெற்றியடைவதே நம் வாழ்வின் நோக்கமாகும். அதற்காக இறைவன் தந்த கையேடுதான் திருக்குர்ஆன் ஆகும்.

தீர்ப்பு நாள்

தேர்வு என ஒன்று நடத்தப்பெற்றால் அதற்கான தீர்ப்பு என்று ஒன்று உண்டல்லவா... அத்தீர்ப்பு பற்றி இவ்வாறு கூறுகிறான்:
3:185. ஒவ்வோர் ஆத்மாவும் மரணத்தைச் சுகித்தே ஆகவேண்டும்; அன்றியும் - இறுதித் தீர்ப்பு நாளில் தான், உங்க(ள் செய்கைக)ளுக்குரிய பிரதி பலன்கள் முழுமையாகக் கொடுக்கப்படும்;. எனவே எவர் (நரக) நெருப்பிலிருந்து பாதுகாக்கப்பட்டுச் சுவர்க்கத்தில் பிரவேசிக்குமாறு செய்யப்படுகிறாரோ. அவர் நிச்சயமாக வெற்றியடைந்து விட்டார்;. இவ்வுலக வாழ்க்கை மயக்கத்தை அளிக்கவல்ல (அற்ப இன்பப்) பொருளேயன்றி வேறில்லை.

ஆம், மரணத்தில் இருந்து எப்படி யாரும் தப்பமுடியாதோ அதைப் போலவே அதற்குப்பின் வருவதில் இருந்தும் யாரும் தப்பமுடியாது. இங்கு வினைகளை விதைத்த நாம் அவற்றின் விளைவுகளை அனுபவிக்காமல் போய்விடுவோமா? இவ்வுலகில் அநியாயங்கள் செய்தவர்கள் அதற்குரிய தண்டனைகள் பெறாமலே தப்பித்து விடுவதையும் பிறருக்காக தியாகங்கள் செய்தவர்கள் அதற்குரிய பரிசைப் பெறாமலே மறைந்து விடுவதையும் நாம் காண்கிறோம். இறைவன் அவற்றை அப்படியே விட்டு விடுவானா?
ஆம் அன்பர்களே, நீதியின் வேட்கையை நிறைவு செய்வதற்காகவே வருகிறது இறுதித்தீர்ப்பு நாள்! நாமும் நமக்கு முன்சென்றோரும் நமது பின்தோன்றல்களும் என அனைவரும் மரணத்திற்குப் பின் மீண்டும் உயிர் கொடுத்து எழுப்பபடுவோம். அதிலிருந்து யாரும் தப்பமுடியாது.
78:17,18. நிச்சயமாகத் தீர்ப்புக்குரிய நாள், நேரம் குறிக்கப்பட்டதாகவே இருக்கிறது. ஸூர் (எக்காளம்) ஊதப்படும் அந்நாளில் நீங்கள் அணிஅணியாக வருவீர்கள்.

அந்நாளில் பயங்கரமான நிகழ்வுகள் நடக்கும் என்று திருக்குர்ஆன் எச்சரிக்கிறது.
.தன் பெற்றோர், பிள்ளைகள்,  உறவினர்,  வாழ்க்கைத்துணைகள், நண்பர்கள் என பலரும் இருந்தாலும் யாரும் யாருக்கும் உதவி செய்யமாட்டார்கள். அந்நாளின் அமளியில் இருந்து தன்னைத் தற்காத்துக்கொள்வதிலேயே ஈடுபட்டிருப்பார்கள்.

80:33.ஆகவே, (யுக முடிவின் போது காதைச் செவிடாக்கும் பெருஞ் சப்தம் வரும் போது -

80:34.அந்த நாளில் மனிதன் விரண்டு ஓடுவான் - தன் சகோதரனை விட்டும் -

80:35.தன் தாயை விட்டும், தன் தந்தையை விட்டும்;

80:36.தன் மனைவியை விட்டும், தன் மக்களை விட்டும்-

80:37.அன்று ஒவ்வொரு மனிதனுக்கும் அவனவன் (அவல) நிலையே போதுமானதாயிருக்கும்.

பதிவேடுகள் சாட்சி கூறும் நாள்

நமது செயல்கள் அனைத்தும் இன்று பதிவாகின்றன. நம்மைச்சுற்றி எழும் ஒலி, ஒளி அலைகள் ஏற்படுத்தும் பதிவுகள் ஒருபுறம், நம்மைக் கேட்காமலே நமது மூளை செய்யும் பதிவுகள் ஒருபுறம் என பதிவுகளுக்குப் பஞ்சமில்லை என்பது தெளிவு. நமது ஒவ்வொருவரது வாழ்வின் அம்சங்களும் அணுவணுவாக அன்று வெளியிடப்படும்.

99:7,8. எனவே, எவர் ஓர் அணுவளவு நன்மை செய்திருந்தாலும் அதனை அவர் கண்டு கொள்வார். அன்றியும், எவர் ஓர் அணுவளவு தீமை செய்திருந்தாலும், அதனையும் அவர் கண்டு கொள்வார். 

நமது செயல்கள் பதியப்பட்ட புத்தகம் நம் முன்னே கொண்டுவரப்படும். அன்று அநீதி இழைத்தோருக்கும் அநீதி இழைக்கப்பட்டவர்களுக்கும் நீதி பாலித்தவர்களுக்கும் நீதி பாலிக்காதவர்களுக்கும் முழுமையான முறையில் நியாயம் வழங்கப்படும். வழக்குரைஞர்களோ வாதாடுதலோ அங்கு இல்லை.

36:65. அந்த நாளில் நாம் அவர்களின் வாய்களின் மீது முத்திரையிட்டு விடுவோம்; அன்றியும் அவர்கள் சம்பாதித்துக் கொண்டிருந்தது பற்றி அவர்களுடைய கைகள் நம்மிடம் பேசம்; அவர்களுடைய கால்களும் சாட்சி சொல்லும்.

தீர்ப்பு வழங்கப்பட்டபின் ஒவ்வொருவரது நிலையான தங்குமிடம் தீர்மானிக்கப்படும். அவரவர் செயல்களின் எடைக்கேற்ப அவர் சொர்க்கத்திற்கோ அல்லது நரகத்திற்கோ அனுப்பப்படுவார்.

101:6-9 எனவே, (அந்நாளில்) எவருடைய நன்மையின் நிறை கனத்ததோ- அவர் திருப்தி பொருந்திய வாழ்வில் இருப்பார். ஆனால் எவனுடைய நன்மையின் நிறை இலேசாக இருக்கிறதோ- அவன் தங்குமிடம் ''ஹாவியா'' (எனும் தீக்கிடங்கு)தான்.

தீர்ப்புநாள் அன்று சத்தியத்தை மறுத்தோரின் நிலை

64:7. (மரித்த பின்னர்) அவர்கள் எழுப்பப்படவே மாட்டார்கள் என்று சத்திய மறுப்பாளர்கள் எண்ணிக் கொண்டனர்; ''அப்படியல்ல! என்னுடைய இறைவன் மீது சத்தியமாக, நீங்கள் நிச்சயமாக எழுப்பப்படுவீர்கள்! பிறகு நீங்கள் செய்து கொண்டிருந்தவை பற்றி நிச்சயமாக அறிவிக்கப்படுவீர்கள் - மேலும் அது இறைவனுக்கு மிகவும் எளிதேயாகும்'' என்று (நபியே!) நீர் கூறுவீராக.

அந்நாளில் தீங்குசெய்தவர்கள் தங்களின் நிலைகுறித்து துக்கத்தில் ஆள்வார்கள்.

25:27. அந்நாளில் அநியாயக்காரன் தனது இரு கைகளையும் கடித்துக்கொண்டு; ''அத்தூதருடன் நானும் - (நேரான) வழியை எடுத்துக் கொண்டிருக்க வேண்டாமா?"" எனக் கூறுவான்.

78:40. நிச்சயமாக, நெருங்கி வரும் வேதனையைப்பற்றி உங்களுக்கு எச்சரிக்கை செய்கிறோம் - மனிதன் தன் இருகைகளும் செய்து முற்படுத்தியவற்றை அந்நாளில் கண்டு கொள்வான் - மேலும் சத்தியத்தை மறுத்தவன்  ''அந்தோ கைசேதமே! நான் மண்ணாகிப் போயிருக்க வேண்டுமே!'' என்று (பிரலாபித்துக்) கூறுவான்.

சொர்க்கத்திலும் நரகத்திலும் என்ன உள்ளது?
இறைவன் இவற்றைப்பற்றி அடிக்கடி தனது இறுதி வேதத்தில் குறிப்பிட்டுள்ளான். 

32:17. அவர்கள் செய்த (நற்) கருமங்களுக்குக் கூலியாக மறைத்து வைக்கப்பட்டுள்ள கண் குளிர்ச்சியை (மறுமையின் பேரின்பத்தை) எந்த ஓர் ஆன்மாவும் அறிந்து கொள்ள முடியாது.

98:8. அவர்களுடைய நற்கூலி, அவர்களுடைய இறைவனிடத்திலுள்ள அத்னு என்னும் சுவர்க்கச் சோலைகளாகும். அவற்றின் கீழே ஆறுகள் ஓடிக்கொண்டு இருக்கும்; அவற்றில் அவர்கள் என்றென்றும் தங்கியிருப்பார்கள்; அல்லாஹ்வும் அவர்களைப் பற்றி, திருப்தி அடைவான், அவர்களும் அவனைப்பற்றி திருப்தி அடைவார்கள்; தன் இறைவனுக்குப் பயப்படுகிறாரே அத்தகையவருக்கே இந்த மேலான நிலை உண்டாகும்.

69:22-24. உயர்ந்த சுவர்க்கத்தில் இருப்பார். அதன் கனி(வகை)கள் (கைக்கு எட்டியதாக) சமீபத்திலிருக்கும். “சென்று போன நாட்களில் நீங்கள் முற்படுத்தி(யனுப்பி)ய (நற்செயல்களின்) காரணத்தால், நீங்கள் இப்போது மகிழ்வோடு புசியுங்கள்; இன்னும் பருகுங்கள்” (என அவர்களுக்குக் கூறப்படும்).

இவற்றிலிருந்தும் இன்னும் பல நபிமொழிகளில் இருந்தும் நாம் அறிந்துகொள்வது, சொர்க்கவாழ்வு என்பது நிரந்தரமானது; அங்கு பிணி, மூப்பு, இறப்பு போன்றவை இராது; சொர்க்கவாசிகள்  அனைவரும் மாறா இளமையுடனும் அழகுடனும், துன்பதுயரங்கள் இன்றி மகிழ்ச்சியுடனும்  இருப்பர். அங்கு காணப்படுவதெல்லாம் அன்பு, அமைதி, அச்சமின்மை, உறவுபாராட்டுதல், தூய்மையான வாழ்க்கைத்துணைகள், சுவையான திகட்டாத, ஆரோக்கியமான உணவுவகைகள், இப்படி நமது மனம் விரும்பும் அனைத்தும் என நம்மால் எண்ணிப்பார்க்கமுடியாத இன்பங்களை அங்கு இறைவன் நமக்காகப் படைத்திருக்கிறான் என்பதே. 

சொர்க்கத்தை வாக்களிக்கும் குர்ஆன், தீமைகள் செய்தவர்களுக்கு வாய்க்க இருக்கும் நரகத்தைப் பற்றியும் கூறகிறது. அது இறைவனின் அருட்கொடைகளுக்கு நன்றி மறந்து தான்தோன்றித்தனமாக வாழ்ந்த கொடியோருக்காகவும் இறைவனையும் அவன் தூதர்களையும் வேதங்களையும் நிராகரித்தோருக்காகவும் காத்திருக்கிறது. கொழுந்துவிட்டு எரியும் நெருப்பின் நடுவே மரணமற்ற வாழ்வும் அகோர பசியும் தாகமும் அதைத்தீர்க்க உணவாக முட்செடிகளும் கொதிநிலை அடைந்த பானங்களும் என்று தொடர் வேதனைகளின் இருப்பிடமாக இருக்கும். நரக வேதனைகள் பற்றி திருக்குர்ஆன் எச்சரிக்கிறது:

4:56 நமது வசனங்களை மறுப்போரை பின்னர் நரகில் கருகச் செய்வோம். அவர்களின் தோல்கள் கருகும் போதெல்லாம் அவர்கள் வேதனையை உணர்வதற்காக வேறு தோல்களை அவர்களுக்கு மாற்றுவோம். இறைவன் மிகைத்தவனாகவும், ஞானமிக்கவனாகவும் இருக்கிறான். 

78:21-26 வரம்பு மீறியோரின் தங்குமிடமாக நரகம் காத்துக் கொண்டிருக்கிறது. அதில் யுகம் யுகமாகத் தங்குவார்கள். அங்கே குளிர்ச்சியையும், (குளிர்) பானத்தையும் சுவைக்க மாட்டார்கள். கொதி நீரையும், சீழையும் தவிர. இது செயலுக்கேற்ற கூலி!

இவை போன்ற பல வர்ணனைகள் குர்ஆனிலும் முஹம்மது (ஸல்) அவர்களின் மொழிகளிலும் இடம்பெற்றுள்ளன.

நிச்சயமாக நடந்தேறக்கூடிய உண்மைகள்

சகோதர சகோதரிகளே.... தீர்ப்பு நாள், சொர்க்கம், நரகம் ஆகியவை எல்லாம் கற்பனையோ கட்டுக்கதைகளோ அல்ல... இல்லாமையில் இருந்து இந்திரியத் துளியாக உருவானது உண்மை. அதே இந்திரியத் துளிதான் இன்று மனிதனாக உருவாகி நடமாடிக்கொண்டு இருக்கிறது என்பதும் உண்மை! தொடர்ந்து வரும் மரணம் என்பதும் உண்மை! அதேபோல அடுத்த கட்டமான மறுமையும் உண்மையே! நற்கூலிகளோ தண்டனைகளோ அவற்றிற்குத் தகுதியானவர்கள் நிச்சயம் அனுபவிப்பார்கள். நிரந்தரமற்ற இவ்வுலக வாழ்க்கைக்காக எத்தனையோ சிரமங்கள் மேற்கொள்ளூம் நாம் நமது நிரந்தர வாழ்விடத்தை தீர்மானிக்கும் விடயத்தில் அலட்சியம் காட்டலாமா?

அறிகுறிகளைக் கொண்டு பகுத்தறிவோம்!

இன்று நம்மால் இறைவனையோ தீர்ப்பு நாளையோ சொர்க்கம் நரகத்தையோ காண முடியாது. ஆனால் மறுமையில் அவற்றைக்  காணும்போது இறைவனையும் மறுமையயும் அனைவரும் நம்புவர். ஆனால் அப்போது அந்த நம்பிக்கை ஒருவருக்கும் பயனளிக்காது. தேர்வு எழுதுவதற்கான நேரம் முடிந்த பின் எப்படி தேர்வு எழுத முடியும்? இறைவனைக் காணமுடியாதபோது அவனை நம்ப வேண்டும் என்பதில்தான் நாம் சோதிக்கப்படுகிறோம்.

எப்படி நம்புவது?

புலன்களுக்கு எட்டும் தகவல்களை ஆய்வு செய்து புலன்களுக்கு எட்டாத விடயங்களை அறிவதற்கே பகுத்தறிவு எனப்படும். இன்று நம்மால் இறைவனையும் மறுமையையும் காண முடியாவிட்டாலும் நம்மைச் சுற்றி அவற்றை நிரூபிக்கும் அத்தாட்சிகள் ஏராளமாகக் காணப்படுகின்றன. அவ்வாறு இறைவனைப் பற்றியும் மறுமை வாழ்வு பற்றியும் பகுத்தறியச் சொல்கிறது திருக்குர்ஆன்.

3:190. நிச்சயமாக, வானங்கள், பூமி ஆகியவற்றின் படைப்பிலும்; இரவும், பகலும் மாறி மாறி வருவதிலும் அறிவுடையோருக்கு திடமாக அத்தாட்சிகள் பல இருக்கின்றன.

36:77-79. மனிதனை ஒரு துளி இந்திரியத்திலிருந்து நாமே நிச்சயமாகப் படைத்தோம் என்பதை அவன் பார்க்கவில்லையா? அவ்வாறிருந்தும், அவன் (நமக்கு) வெளிப்படையான தர்க்கவாதியாகி விடுகிறான். மேலும், அவன் தன் படைப்பை (தான் படைக்கப்பட்டதெப்படி என்பதை) மறந்துவிட்டு, அவன் நமக்காக ஓர் உதாரணத்தையும் கூறுகின்றான்; “எலும்புகள் அவை மக்கிப் போய் விட்ட பின் அவற்றை உயிர்ப்பிப்பது யார்?” என்று.  “முதல் முதலில் அவற்றை உண்டு பண்ணியவனே (பின்னும்) அவற்றுக்கு உயிர் கொடுப்பான். அவன் எல்லாவகைப் படைப்புகளையும் நன்கறிந்தவன்” என்று (நபியே!) நீர் கூறுவீராக!

தேர்வில் வெல்வது எப்படி?

நமக்குத் தேர்வு நடந்து கொண்டிருப்பதையும் அதில் வெற்றிபெற வேண்டியதன் அவசியத்தையும் புரிந்து கொண்டோம். வெற்றியாளர்களுக்குக் கிடைக்கவிருக்கும் எண்ணிப்பார்க்கவியலாத அருட்கொடைகளைப் பற்றியும் அறிந்து கொண்டோம். ஆனால் தேர்வில் எவ்வாறு வெல்வது?  அதற்கான வழி எளிமையானது... நாம் செய்ய வேண்டியது இதுதான்... நாம் அன்றாடம் அனுபவித்துவரும் அளவில்லாத அருட்கொடைகளுக்கு நன்றிக் கடனாக அந்த இறைவனுக்கு நாம் கீழ்படிந்து வாழவேண்டும். உதாரணமாக உங்களுக்கு நீங்கள் ஒரு நிறுவனத்தில் வேலை செய்கிறீர்கள் என்று வைத்துக் கொள்ளுங்கள். உங்கள் முதலாளி உங்களுக்கு உங்களுக்கு தாராளமாக சம்பளம் தருகிறார்.....  மட்டுமல்ல உங்கள் போக்குவரத்துக்கு ஒரு காரும் ஓட்டுனரும் உங்களுக்கு எடுபிடி வேலைக்கு ஒரு பணியாளையும் தன் செலவில் தருகிறார். உங்களை மனமார நேசிக்கவும் செய்கிறார். சாதாரண நிறுவனங்களில் கிடைக்காத பல சலுகைகளையும் இங்கு தருகிறார்.... என்றால் நீங்கள் அவரிடம் எவ்வாறு நடந்து கொள்வீர்கள்?

அவருக்கு அதிகமதிகம் விசுவாசத்தோடு சேவை செய்வீர்கள்தானே! இப்போது அந்த முதலாளியின் ஸ்தானத்தில் உங்கள் மீது தன் அளவில்லா அருட்கொடைகளை சொரிந்து வரும் உங்கள் இரட்சகனை வைத்துப்பாருங்கள்.... இயற்கையாகவே இன்னும் அதிகமதிகம் விசுவாசமும் கீழ்படிதலும் வெளிப்பட வேண்டும்தானே! ஆம் அன்பர்களே..... இந்த கீழ்படிதலையே ஒற்றை வார்த்தையில் இஸ்லாம் என்கிறோம்.

துறவறம் கூடாது

அடிபணிதல் என்றால் உலக வாழ்க்கையைத் துறந்து ஆன்மீகத்தில் முழுக்க மூழ்குவது என்ற அர்த்தம் இல்லை. மாறாக நாம் அன்றாடம் வாழும் வாழ்க்கையை இறைவன் கற்பிக்கும் கட்டுப்பாடுகளுக்கு உட்பட்டு வாழ்வதே இஸ்லாம்! கல்வி, தொழில், வணிகம், குடும்பம், இல்லறம், சமூக வாழ்க்கை, ஆன்மிகம் போன்ற அனைத்திலும் சரளமாக ஈடுபட்டு சக மனிதர்களின் உரிமைகளை மதித்து பொறுப்புணர்வோடு வாழ்வதே இஸ்லாம்! ஆம், இஸ்லாத்தைப் பொறுத்தவரை வாழ்க்கையே வழிபாடு, வழிபாடே வாழ்க்கை!

அவ்வாறு கட்டுப்பாடோடு வாழ்வதால் நமக்கு விளைவது மென்மேலும் நன்மையே! தனிநபர் வாழ்விலும் குடும்ப அங்கத்தினர் மத்தியிலும் சமூக வாழ்விலும் ஒழுக்கம் பேணப்படும். செய்யும் நன்மைகளுக்கு இங்கில்லாவிடினும் மறுமையில் சொர்க்கம் வாய்க்கும் என்ற நம்பிக்கை மனிதனை சுயநலம் மறந்து பிறர்நலம் பேணவும் பரஸ்பரம் விட்டுக்கொடுக்கவும் தியாகங்கள் மேற்கொள்ளவும்  தூண்டுகிறது. அவ்வாறு மக்கள் வாழத் தலைப்பட்டால் நமது பூமி எவ்வளவு மகிழ்ச்சிகரமான வாழ்விடமாக மாறும் என்பதை சற்று சிந்தித்துப்பாருங்கள்!

ஆக, கரும்பு தின்னக் கூலி கிடைப்பது போலத்தான் இது. இறைவனின் வழிகாட்டுதலுக்கு ஏற்ப வாழ்க்கையை அமைத்து வாழும்போது இவ்வுலக வாழ்விலும் அமைதியைப் பெறுகிறோம். அவ்வாறு வாழ்ந்ததற்குப் பரிசாக மறுமையில் தீராத இன்பங்கள் நிறைந்த சொர்க்கத்தையும் அடைகிறோம்!

இஸ்லாத்தின் அடிப்படை நம்பிக்கைகள் என்ன?

இஸ்லாம் எதையும் குருட்டுத்தனமாக நம்பச் சொல்லவில்லை. மனிதன் மறுக்கவே முடியாத சில அடிப்படை உண்மைகளை பகுத்தறிவை பயன்படுத்தி அவற்றை உணர்ந்து அதில் நிலைத்திருக்கச் சொல்கிறது இஸ்லாம். அவை இவையே:

1)     ஒன்றே மனிதகுலம்- அதாவது உலகின் அனைத்து மனிதர்களும் ஒரே ஆண் ஒரே பெண் ஜோடியில் இருந்து உருவாகி உலகெங்கும் பல்கிப் பெருகியவர்களே. எனவே நிறம், இனம், இடம், மொழிகள் மாறுபட்டாலும் அனைவரும் ஒரே குடும்பத்தின் அங்கத்தினர்களே.

2)     ஒருவன் மட்டுமே இறைவன்: அனைத்து மனித குலத்தையும் படைத்து பரிபாலிக்கும் ஏக இறைவன் மட்டுமே வணங்குவதற்கும் பிரார்த்திப்பதற்கும் தகுதியானவன். அவன் அல்லாத எதற்கும் யாருக்கும் கடவுள் அந்தஸ்து என்பது கிடையாது. அவன் அல்லாதவற்றை கடவுள் என்று அழைப்பதும் வணங்குவதும் அவற்றிடம் பிரார்த்திப்பதும் வீணும் மோசடியும் ஆகும். உயிரற்ற உணர்வற்ற பொருட்களை கடவுள் என்று கற்பிக்கும்போது மனித மனங்களில் இருந்து இறையச்சம் அகன்று போகிறது. அதனால் சமூகத்தில் பாவங்களும் மூடநம்பிக்கைகளும் மலிகின்றன. கடவுளின் பெயரால் மக்களை சுரண்ட இடைத்தரகர்களுக்கு இது வழியாகிறது. மேலும் படைத்தவனுக்கு பதிலாக படைப்பினங்கள் வணங்கப்படும்போது மனிதகுலம் அவர்கள் வணங்கும் கடவுளர்களின் அடிப்படையில் பிளவுபட்டு ஒருவரை ஒருவர் தாக்கி அழித்துக் கொள்ளும் நிலையும் உண்டாகிறது. எனவே இப்பாவம் இறைவனால் மன்னிக்கப்படாத பெரும் பாவமாகும்.

4:116. நிச்சயமாக அல்லாஹ் தனக்கு இணை வைப்பதை மன்னிக்கவே மாட்டான்; இது அல்லாத (பாவத்)தைத் தான் நாடியவருக்கு மன்னிப்பான்; எவன் ஒருவன் அல்லாஹ்வுக்கு இணை வைக்கின்றானோ, அவன் நிச்சயமாக வெகு தூரமான வழிகேட்டில் ஆகிவிட்டான்.

(அல்லாஹ் என்றால் வணக்கத்துக்குத் தகுதிவாய்ந்த ஒரே இறைவன் என்று பொருள்)

3)     இறைவனிடமே மீளுதல்: இவ்வுலக வாழ்வை முடித்துக்கொண்டு இறைவனிடம் மீள வேண்டும். நம் செயல்களுக்கு இறைவனிடம் விசாரணையும் அதைத் தொடர்ந்து சொர்க்கமோ அல்லது நரகமோ கிடைக்கவுள்ளது.

இறைவன் தரும் வழிகாட்டுதலைப் புறக்கணித்தால் என்ன நடக்கும்?

இன்று பலரும் தங்கள் மூதாதையர் பின்பற்றிய மார்க்கங்களையும் துறவறத்தை போதிக்கும் மார்க்கங்களையும்  இறைமறுப்புக் கொள்கைகளையும் மனிதர்கள் உணர்ச்சி வசத்தால் தூண்டப்பட்டு அவர்களாகவே உருவாக்கிய கொள்கைகளையும் அடிப்படையாகக்கொண்டு பல்வேறு வாழ்க்கை நெறிகளை வகுத்துக்கொண்டு வாழ்கின்றனர். இன்னும் சிலர் எதுவுமே எங்களுக்குத் தேவை இல்லை என்று மனம்போன போக்கில் வாழ்கின்றனர். இறைவனின் பார்வையில் இவை அனைத்துமே தவறு என்கிறது திருக்குர்ஆன்!

இவ்வுலகுக்கு சொந்தக்காரனான இறைவன் ஒரு குறிப்பிட்ட நோக்கத்துக்காக இவ்வுலகைப் படைத்துள்ளான் என்பதை மேலே தெளிவு படுத்தியுள்ளோம். அவன் நடத்தும் பரீட்சையில் தனது அடியார்கள் வெற்றி அடைவதற்காக ஒரு தெளிவான வாழ்க்கை நெறியை வகுத்து அதைத் தனது வேதங்கள் மூலமாகவும் தூதர்கள் மூலமாகவும் மக்களுக்கு அறிவித்தும் வந்துள்ளான். அதைப் புறக்கணித்து தன்னிச்சையாக உருவாக்கிய மார்க்கங்களை அவன் எப்படி ஏற்றுக்கொள்வான்? இதோ அதை தனது இறுதி வேதத்தில் அதிகாரபூர்வமாக அறிவிக்கிறான் பாருங்கள்:

3:83. இறைவனின் மார்க்கத்தைவிட்டு (வேறு மார்க்கத்தையா) அவர்கள் தேடுகிறார்கள்? வானங்களிலும் பூமியிலும் உள்ள (அனைத்துப் படைப்புகளும்) விரும்பியோ அல்லது வெறுத்தோ அவனுக்கே சரணடைகின்றன; மேலும் (அவை எல்லாம்) அவனிடமே மீண்டும் கொண்டு வரப்படும்.

3:85. இன்னும் இஸ்லாம் அல்லாத (வேறு) மார்க்கத்தை எவரேனும் விரும்பினால் (அது) ஒருபோதும் அவரிடமிருந்து ஒப்புக் கொள்ளப்பட மாட்டாது; மேலும் அ(த்தகைய)வர் மறுமை நாளில் நஷ்டமடைந்தோரில்தான் இருப்பார்.

ஆம் அன்பர்களே இது இறைவனுடைய பூமி. நாம் இறைவனால் படைக்கப்பட்டவர்கள். அவன் வழங்கும் அமைதியான வாழ்க்கை நெறியைப் புறக்கணித்து சர்வ வல்லமை கொண்டவனும் நுண்ணறிவாளனும் ஆகிய அவனுக்குப் போட்டியாக சிற்றறிவு கொண்ட பலவீனமான மனிதர்கள் புனைந்து வழங்கும் மார்க்கங்கள் எப்படி வெற்றியைத் தரும்? அவை மோட்சம் தராது என்பது மட்டுமல்ல, இந்த பூமி வாழ்க்கையையும் குழப்பத்தில் ஆழ்த்திவிடுகின்றன என்பதை நாம் சிந்திக்கக் கடமைப்பட்டுள்ளோம்.

முன்னோர்களின் மார்க்கத்தை பின்பற்றலாமா?

இவ்வுலகுக்கு இறுதித்தூதராக நபிகள் நாயகம்  அனுப்பப்பட்ட நிலையில் அவரது வருகைக்குப் பிறகு வாழ்வோர் அனைவரும் அவர் மூலமாக அனுப்பப்பட்ட இஸ்லாத்தையே ஏற்று வாழ கடமைப்பட்டுள்ளோம். முந்தைய தூதர்கள் மூலமாக அனுப்பப்பட்ட வேதங்கள் ஒரு குறிப்பிட்ட காலத்தில் குறிப்பிட்ட மக்களுக்காக அனுப்பப்பட்டவை என்பதால் அவை இறைவனிடம் காலாவதியாகி உள்ளன. மேலும் அவை இன்று மனித கரங்களால் சிதைக்கப்பட்ட நிலையில் உள்ளன. அவை ஏற்கப்படாது என்று இறைவன் எச்சரிக்கிறான்:

3:19. நிச்சயமாக இஸ்லாம்தான் அல்லாஹ்விடத்தில் (ஒப்புக்கொள்ளப்பட்ட) மார்க்கமாகும்; முன்னாள் வேதம் கொடுக்கப்பட்டவர்கள் (இதுதான் உண்மையான மார்க்கம் என்னும்) அறிவு அவர்களுக்குக் கிடைத்த பின்னரும் தம்மிடையேயுள்ள பொறாமையின் காரணமாக (இதற்கு) மாறுபட்டனர்; எவர் அல்லாஹ்வின் வசனங்களை நிராகரித்தார்களோ, நிச்சயமாக அல்லாஹ் (அவர்களுடைய) கணக்கைத் துரிதமாக முடிப்பான்.

முஹம்மது நபி அவர்கள்தான் இறுதித் தூதரா?

நபிகள் நாயகம் (ஸல்) அவர்களின் வருகைக்கு முன்னால் உலகின் பல்வேறு பாகங்களுக்கு பல்வேறு காலகட்டங்களில் வந்த இறைத்தூதர்களும் மேற்கூறப்பட்ட இஸ்லாத்தின் அடிப்படைகளையே தத்தமது மக்களுக்கு போதித்து அவர்களிடையே முன்மாதிரிகளாக வாழ்ந்து காட்டிச் சென்றார்கள். ஆனால் அவர்களின் மறைவுக்குப் பின்னர் ஷைத்தானின் தூண்டுதலால் சிலர் அத்தூதர்களுக்கு நினைவுச் சின்னங்களும் சிலைகளும் எழுப்பி அவற்றையே வழிபட ஆரம்பித்தார்கள். இடையிடையே இடைத்தரகர்களும் புகுந்துகொண்டு அத்தூதர்கள் கொண்டுவந்த வேதங்களையும் திரித்து மக்களை கடவுளின் பெயரால் சுரண்டினார்கள். இவ்வாறு வழிகேட்டில் சென்ற மக்களைத் திருத்துவதற்காக இறைவன் அவ்வப்போது தன்  தூதர்களை அனுப்பி வந்துள்ளான். இந்த தூதர்களின் வரிசையில் இறுதியாக வந்தவர்தான் முஹம்மது நபி அவர்கள். இன்னும் இவர் உலகம் முழுமைக்குமாக அனுப்பப்பட்ட தூதர் ஆவார்.

முக்கியமாக சில விடயங்களை கவனித்தால் நீங்கள் இதை அறிந்து கொள்ளலாம்:

1)     படைத்த இறைவனை நேரடியாக உருவமின்றி வணங்குவது எப்படி என்பதை இவர் கற்றுக்கொடுத்தார். உலக மக்கள்தொகையின் சுமார் கால்வாசி பேர் இதைக் கடைபிடித்து வருவது.

2)     அவ்வளவு மக்கள் இவரை உயிருக்குயிராக நேசித்தாலும் பூமிப்பந்தில் எங்குமே இவரது உருவச்சிலையோ படமோ காணப்படுவது இல்லை.

3)     இவர் மூலம் அனுப்பப்பட்ட குர்ஆன் என்ற வேதம் சிதையாமல் மூல மொழியிலேயே பாதுகாக்கப்படுவது. மனித வாழ்வின் அனைத்து பிரச்சினைகளுக்கும் தீர்வு தருவது.

4)     இவரது வாழ்க்கை முன்மாதிரியும் இவரது போதனைகளும் மிக நுணுக்கமாகவும் நேர்த்தியாகவும் பதிவு செய்யப்பட்டு உலகெங்கும் மக்களுக்கு பின்பற்றப்படுவதற்கு எளிதான முறையில் அமைந்திருப்பது.

5)     இவர் போதித்த கொள்கை பரவப்பரவ மக்களைப் பிரித்து வைத்திருக்கும் ஜாதிகள், தீண்டாமை போன்றவை மறைந்து மனித சமத்துவமும் உலகளாவிய சகோதரத்துவமும் மலர்ந்து வருவது. இது நுழையும் இடங்களில் எல்லாம் மனித உரிமைகள் மீட்கப்படுவது.

இன்னும் இவர் போதித்த கொள்கை உலகில் இன்று அநீதியாளர்களுக்கும் ஆதிக்க சக்திகளுக்கும் சவாலாக அமைந்திருப்பதும் நபிகளார்தான் இன்றைய காலகட்டத்துக்காக அனுப்பப்பட்ட தூதர் என்பதை உணர்த்துகின்றன.

உண்மையை பரிசோதித்து அறியுங்கள்

ஆக, அன்பு சகோதர, சகோதரிகளே... திருக்குர்ஆன் என்பது  எந்த மனிதருடைய கூற்றும் அல்ல!. நம் அனைவரையும் படைத்தவனாகிய இறைவனே நம்மோடு இதில் பேசுகிறான். அவனது வழிகாட்டுதலையும் எச்சரிக்கைகளையும் இன்று நம்மிடையே தாங்கி நிற்கிறது இறுதிவேதம் திருக்குர்ஆன். இதை ஏற்போருக்கு நன்மாராயமும் மறுப்போருக்கு எச்சரிக்கையும் விடுக்கிறான் இவ்வுலகின் அதிபதி! அதேவேளையில் இதை ஆய்வு செய்து ஏற்றுக்கொள்ளவும் குறைகளைக் கண்டுபிடிக்கவும் அறைகூவல் விடுக்கிறான். ஏற்காதோரின் நிலை என்னவாகும் என்பது பற்றியும் கூறுகிறான்:

4:82. அவர்கள் இந்த குர்ஆனை (கவனமாக) சிந்திக்க வேண்டாமா, (இது) அல்லாஹ் அல்லாத பிறரிடமிருந்து வந்திருந்தால், இதில் ஏராளமான முரண்பாடுகளை அவர்கள் கண்டிருப்பார்கள்.

2: 23,24. இன்னும், (முஹம்மது (ஸல்) என்ற) நம் அடியாருக்கு நாம் அருளியுள்ள (வேதத்)தில் நீங்கள் சந்தேகம் உடையோராக இருப்பீர்களானால், (அந்த சந்தேகத்தில்) உண்மை உடையோராகவும் இருப்பீர்களானால் அல்லாஹ்வைத்தவிர உங்கள் உதவியாளர்களை (யெல்லாம் ஒன்றாக) அழைத்து (வைத்து)க்கொண்டு இது போன்ற ஓர் அத்தியாயமேனும் கொண்டு வாருங்கள். (அப்படி) நீங்கள் செய்யாவிட்டால்-அப்படி செய்ய உங்களால் திண்ணமாக முடியாது- மனிதர்களையும் கற்களையும் எரிபொருளாகக் கொண்ட நரக நெருப்பை அஞ்சிக் கொள்ளுங்கள். (அந்த நெருப்பு, இறைவனையும் அவன் வேதத்தையும் ஏற்க மறுக்கும்) காஃபிர்களுக்காகவே அது சித்தப்படுத்தப்பட்டுள்ளது.

இறுதியாக..... நமக்கு கிடைத்திருப்பது ஒரே ஒரு வாய்ப்பு. மரணத்திற்குப் பின் எழுப்பப்படுவதும் தீர்ப்பு நாளும் சொர்க்கம் நரகமும் உண்மையானவை. ஆகவே வாருங்கள் அன்பர்களே, விழிப்புணர்வோடு  நமக்குக் கிடைத்திருக்கும் வாய்ப்பைப் பயன்படுத்துவோம். தேர்வில் வெற்றி பெறுவோம்.....  நம் வாழ்க்கையின் நோக்கத்தை நிறைவேற்றுவோமாக, காலம் கடந்துபோகும் முன்னே!

இந்த வாய்ப்பு எப்போது முடியும்? மரணம் வரும் வரை என்பதை நாம் அறிவோம். ஆனால் அந்த மரணம் என்பது தினமும் நமக்கு வாய்க்கிறது என்பதை அறிவீர்களா? ஆம் அன்பர்களே உறக்கத்தின் போதும் நம் உயிர்கள் இறைவனால் கைப்பற்றப்படுகிறது என்பதை அவனே அறிவிப்பதைப் பாருங்கள்:

39:42. இறைவன் உயிர்களை அவை மரணிக்கும் போதும், மரணிக்காதவற்றை அவற்றின் நித்திரையிலும் கைப்பற்றி, பின்பு எதன் மீது மரணத்தை விதித்துவிட்டானோ அதை(த் தன்னிடத்தில்) நிறுத்திக் கொள்கிறான்; மீதியுள்ளவற்றை ஒரு குறிப்பிட்ட தவணை வரை (வாழ்வதற்காக) அனுப்பி விடுகிறான் - சிந்தித்துப் பார்க்கும் மக்களுக்கு, நிச்சயமாக அதில் அத்தாட்சிகள் இருக்கினறன.

http://holyqurantamil.blogspot.com
திருக்குர்ஆன் தமிழாக்கம்

கேரளாவும் தமிழ்நாடும் இணைய முடியுமா?

 இன்று நம் நாடு பல்வேறுவிதமான கற்பனை உருவங்களாலும் மாயைகளாலும் மூடநம்பிக்கைகளாலும் ஆளப்பட்டு அனைவரையும் அலைக்கழித்துக் கொண்டிருக்கிறது. அவற்றில் ஒன்றுதான் இந்த எல்லைக்கோடு என்பது. உதாரணமாக மேலே கூறப்பட்ட இரு மாநிலங்களை எடுத்துக் கொள்ளுங்கள். கேரளாவுக்கும் தமிழ்நாட்டுக்கும் இடையில் முல்லைப்பெரியார் நீர் பங்கீடு காரணமாக அவ்வப்போது நடைபெறும் கலவரங்களையும் அவற்றைத் தொடர்ந்து ஏற்படும் உயிர் மற்றும் உடமை இழப்புக்களையும் நாம் அனைவரும் அறிவோம்.

 இப்படிப்பட்ட தீராத பிரச்சினைகளுக்கு என்ன காரணம்? வேறு எதுவுமல்ல, எல்லைக்கோடு என்ற ஒரு கற்பனைக் கோடுதான்! தொலைநோக்கிகள் கொண்டும் நுண்ணோக்கிகள் கொண்டும் பூமியை ஆராய்ந்தாலும் அகப்படாத ஒன்று.இது. இன்று நவீன தொழில் நுட்பத்தின் உதவியால் செயற்கைக்கோள்களில் இருந்து பூமியை அங்குலம் அங்குலமாக படம்பிடித்து கணிணியில் ஆராய வழிவகை உள்ளது. எப்படி ஆராய்ந்தாலும் தட்டுப்படாத ஒன்று இது! காவிரி நீர் விஷயமாக தமிழகத்துக்கும் கர்நாடகாவுக்கும் இடையே உள்ள பிரச்சினைகளுக்கும் காரணம் இந்த எல்லைக்கோடுதான். நிர்வாக வசதிக்காக எப்போதோ உருவாக்கப்பட்ட இவை இன்று பாமரர்களின் உயிர்குடிக்கும் காரணிகளாக மாறியுள்ளன.

கர்நாடகாவில் வாழும் மக்களும் சரி தமிழ்நாட்டில் வாழும் மக்களும் சரி கேரளாவில் வாழும் மக்களும் சரி.... அனைவரும் அடிப்படையில் மனிதர்களே. ஒரே மனித இனத்தைச் சார்ந்தவர்களே. ஒரே மாதிரியான உருவ அமைப்பு, உடல், இரத்தம், சதை என அனைத்தும் ஒன்று. உணவு, காற்று நீர் என்று அனைவரின் தேவைகளும் ஒன்று. அவற்றைத் தீர்த்துக்கொள்ளும் விதமும் ஒன்றே. இவ்வாறு இருக்கும்போது இவர்களைப் பிரித்து வைத்திருப்பது எது? ஒரே நீர் ஆறாக ஓடி ஒரு கற்பனையான கோட்டைக் கடக்கும்போது எப்படி பிரச்சினை உண்டாகிறது? ஒரு மாநிலத்துக்குள் அது ஓடும்போது இல்லாத பிரச்சினை எல்லைக் கோட்டைத் தாண்டி ஓடும்போது  எப்படி முளைக்கிறது?

இதைப் போலவே மனித உறவையும் சமூக அமைதியையும் இடைவிடாது  பாழ்படுத்திக் கொண்டிருக்கும் இன்னும் சில கற்பனைப் பொருட்களையும் உருவங்களையும் மாயைகளையும் மூடத்தனமான நம்பிக்கைகளையும் நாம் அடையாளம் கண்டு அவற்றைக் களைய ஆவன செய்யக் கடமைப்பட்டுள்ளோம்.

மொழி என்பது ஒரு தகவல்தொடர்புக்கான சாதனம். அதனை நாம் அவ்வாறே புரிந்து கொள்ளவேண்டும். மாறாக இன்ன மொழி பேசும் ஊரில் அல்லது குடும்பத்தில் பிறந்தோம் என்பதற்காக மாற்றார்களை இழிவாகப் பார்க்க நமக்கு எந்த உரிமையும் கிடையாது. மட்டுமல்ல மொழியைக் கடவுளாக சித்தரிப்பதும் மொழியின் பெயரால் தமிழ்த்தாய் அல்லது கன்னடமாதே என்று கற்பனை உருவங்களும் சிலைகளும் செய்து அவற்றை வழிபடுவதும் வழிபடாதவர்களை மிரட்டுவதும் துன்புறுத்துவதும் எந்த வகையில் நியாயம்? சில கவிஞர்களும் ஓவியர்களும் எப்போதோ புனைந்த இந்த “மொழித்” தாய்கள் எங்கே வாழ்கிறார்கள்? யாராவது காட்ட முடியுமா? இன்ன இடத்தில் இன்ன மொழிதான் பேச வேண்டும். இல்லையேல் நீ அந்நியன், நீ இங்கிருந்து வெளியேற வேண்டும் என்றெல்லாம் கோஷமிடுவதும் அவ்வாறு பாமரர்களை அக்கிரமமாக வெளியேற்றுவதும் இன்று பரவலாகவும் சகஜமாகவும் நடந்து கொண்டிருக்கின்றன. இந்த அக்கிரமங்களுக்கு பகடைக்காய்களாக அந்த கற்பனைத் ‘தாய்மார்கள்’ பயன்படுத்தப் படுகிறார்கள்.

இதைப் போலவே நம் நாட்டை வெகுவாக பாதித்து வரும் பெரிய தீமை ஜாதிப்பிரிவினை. யாரோ சிலர் இறைவனின் பெயரால் நம்முள் புகுத்திய சில மூடநம்பிக்கைகள் இன்றும் தொடர்ந்து நம்மில் சிலர் சிலரைத் தாக்கி அழிக்க எதுவாக உள்ளன. இவ்வுலகத்தைப் படைத்துப் பரிபாலிப்பவன் எவனோ அவன் மட்டுமே உண்மை இறைவன் என்பதை பகுத்தறிவு கொண்டு சிந்திப்போர் யாரும் ஐயமின்றி உணரலாம். ஆனால் நம் முன்னோர்களிடம்  சில இடைத்தரகர்கள் படைத்த இறைவனுக்கு பதிலாக பல்வேறுவிதமான படைப்பினங்களையும் உயிரும் உணர்வும் இல்லாத உருவங்களையும் எல்லாம் காட்டி அவற்றையெல்லாம் கடவுள் என்று கற்பித்தார்கள். நம் முன்னோர்கள் அவற்றை நம்பியதால் ஒவ்வொரு கடவுளர்களையும் வணங்கும் கூட்டாத்தார் ஒவ்வொரு ஜாதிகளாயினர். இந்த இடைத்தரகர்கள் அவற்றை உயர்ந்த ஜாதிகள் என்றும் தாழ்ந்த ஜாதிகள் என்றும் தாமாகத் தரம்பிரித்து அவற்றிற்கிடையே பாகுபாட்டை கற்பித்தனர். இதனால் ஒன்றே குலம் ஒருவனே தேவன் என்று இறைவனை எளிமையாகவும் நேரடியாகவும் வணங்கிவந்த மக்களிடையே பாகுபாடும் பகைமை உணர்வுகளும் குலவெறியும் ஜாதிவெறியும் தோன்றின. முன்னோர்களின் வழிமுறைகள் என்று சொல்லி இவை இன்றும் தொடர்கின்றன.

இது கற்காலமல்ல! கல்லாமை ஒழிந்து மக்களிடையே அறிவு வளர்ச்சியும் அரசியல் விழிப்புணர்வும் பெருகிவரும் காலகட்டம் இது. பிரச்சினைகளுக்கு அறிவியல் ரீதியாகவும் பகுத்தறிவு பூர்வமாகவும் தீர்வுகளைத் தேடி ஆராயும் தலைமுறைகள் உருவாகி வரும் காலம் இது. முன்னோர்கள் பின்பற்றினார்கள் என்ற ஒரே காரணத்துக்காக  நாமும் மேற்படி பழக்கவழக்கங்களை கண்மூடித்தனமாக பின்பற்றுதல் நியாயமா? மேற்கூறப்பட்ட கற்பனை வஸ்துக்களும் உருவங்களும் மடத்தனமான நம்பிக்கைகளும் நம்மை அழிவின் விளிம்பிற்க்குக் கொண்டு செல்கின்றன என்பது நிதர்சனமான உண்மை. இருந்தும் நம்மில் பெரும்பாலோரும் மௌனம் சாதிப்பது கொடுமையே!

ஆனால் இவ்வுலகின் அதிபதி இந்த மௌனத்தைப் பற்றியும் நாளை மறுமையில் விசாரிப்பான். எனவே நாம் பொறுப்புணர்வோடு நடந்துகொள்ள வேண்டும். மேற்கூறப்பட்ட தீமைகள் நம்மை பாதிக்காமல் இருக்க நம்மைப் படைத்த இறைவன் தன் திருமறை மூலமும் தனது தூதர் மூலமும் நமக்குப் பரிந்துரைக்கும் வாழ்க்கைத் திட்டத்தை ஏற்றுக்கொண்டு அதன் அடிப்படையில் சமூகத்தைக் கட்டமைக்கப் பணிக்கிறான். அந்த வாழ்க்கைத் திட்டத்திற்குப் பெயர்தான் அரபு மொழியில் இஸ்லாம் என்று அறியப்படுகிறது. இத்திட்டம் முன்வைக்கும் கீழ்கண்ட மூன்று நம்பிக்கைகளை மனித மனங்களில் ஆழமாக விதைத்தால் மனிதனை மூடநம்பிக்கைகளில் இருந்தும் பிரிவினை வாதங்களில் இருந்தும் விடுவித்து உலகளாவிய சகோதரத்துவத்தையும் மனித சமத்துவத்தையும் நாடுகளிடையே ஒற்றுமையையும் நிலைநாட்டலாம்.

  1. ஒன்றே குலம்:

 மனிதர்களே! உங்களை ஒரே ஒருவரிலிருந்து படைத்த உங்கள் இறைவனை அஞ்சுங்கள்! அவரிலிருந்து அவரது துணையைப் படைத்தான். அவ்விருவரிலிருந்து ஏராளமான ஆண்களையும்,பெண்களையும் பல்கிப் பெருகச் செய்தான்.368 எவனை முன்னிறுத்தி ஒருவரிடம் மற்றவர்கள் கோரிக்கை வைப்பீர்களோ அந்த அல்லாஹ்வை அஞ்சுங்கள்! உறவினர்கள் விஷயத்திலும் (அஞ்சுங்கள்!) அல்லாஹ் உங்களைக் கண்காணிப்பவனாக இருக்கிறான். (திருக்குர்ஆன் 4:1)

(அல்லாஹ் என்றால் வணக்கத்திற்கு த் தகுதி வாய்ந்த ஒரே இறைவன் என்று பொருள்)

2.. ஒருவனே இறைவன்:

சொல்வீராக: இறைவன் ஒருவனே, அவன் தேவைகள் அற்றவன் அவன் யாரையும் பெற்றேடுக்கவும் இல்லை. அவனையும் யாரும் பெற்றேடுக்கவும் இல்லை. அவனுக்கு நிகராக யாரும் எதுவும் இல்லை. (திருக்குர்ஆன் 112:1-4)

இறைவனின் தன்மைகளை இவ்வாறு புரிந்துகொண்டு அவனை நேரடியாக வணங்க வேண்டும். இடைத்தரகர்களுக்கோ மூடநம்பிக்கைகளுக்கோ வீண் சடங்குசம்பிரதாயங்களுக்கோ இடம் அளிக்கக் கூடாது. இறைவன் அல்லாத கற்பனை உருவங்களுக்கோ உயிரும் உணர்வும் அற்ற படங்களுக்கோ சிலைகளுக்கோ எந்த இறைத்தன்மையும் கிடையாது. அவற்றை வணங்குவதோ அவற்றுக்கு மரியாதை செய்வதோ பெரும் பாவமாகும்.

 அல்லாஹ்வுக்கு இணை கற்பிப்போருக்கு சொர்க்கத்தை அல்லாஹ் விலக்கப்பட்டதாக ஆக்கிவிட்டான். அவர்கள் சென்றடையும் இடம் நரகம். அநீதி இழைத்தோருக்கு எந்த உதவியாளர்களும் இல்லை” (திருக்குர்ஆன் 5:72)

3.  இறைவனின் நீதிவிசாரனையும் மறுமை வாழ்வும்.
ஒவ்வோர் ஆத்மாவும் மரணத்தைச் சுகித்தே ஆகவேண்டும்; அன்றியும் - இறுதித் தீர்ப்பு நாளில் தான், உங்க(ள் செய்கைக)ளுக்குரிய பிரதி பலன்கள் முழுமையாகக் கொடுக்கப்படும்;. எனவே எவர் (நரக) நெருப்பிலிருந்து பாதுகாக்கப்பட்டுச் சுவர்க்கத்தில் பிரவேசிக்குமாறு செய்யப்படுகிறாரோ. அவர் நிச்சயமாக வெற்றியடைந்து விட்டார்;.இவ்வுலக வாழ்க்கை மயக்கத்தை அளிக்கவல்ல (அற்ப இன்பப்) பொருளேயன்றி வேறில்லை. (திருக்குர்ஆன் 3:185)

அதாவது, இவ்வுலகில் நாம் செய்யும் பாவங்களுக்கும் அத்துமீறல்களுக்கும் தண்டனையாக நரகமும் புண்ணியங்களுக்கும் தியாகங்களுக்கும் பரிசாக சொர்க்கமும் கிடைக்கும்.

இந்த நம்பிக்கைகள் மனித மனங்களில் மெல்ல மெல்ல வேரூன்ற நாளடைவில் மொழி, நிறம், இடம் செல்வம் போன்ற எதுவும் மனித இனத்தைப் பிரிக்கமுடியாது. சமத்துவமும் சகோதரத்துவமும் தானாகவே சமூகத்தில் மலரும். உலக வளங்கள் சகோதர உணர்வோடும் இறைவழிகாட்டுதல்களின் அடிப்படையிலும்  பங்கிட்டுக்கொள்ள மக்களே முன்வருவார்கள். அதனால் ஏற்படும் இழப்புகளை இறைப்போருத்தத்திற்காக மனமுவந்து ஏற்றுக் கொள்வார்கள்! அவ்வாறு கர்நாடமும் தமிழகமும் மட்டுமல்ல. எல்லைக் கோடுகள் மறைந்து அகண்ட பாரதமும் உருவாகும்! நாடுகள் மறைந்து அனைத்து உலகும் ஒன்றாக யாதும் ஊரே யாவரும் கேளிர் என்ற கனவு நனவாகும்!

இது ஒரு மாயையோ அல்லது வெற்றுக்கோஷமோ அல்ல. இந்த நம்பிக்கையின் துளிகளை நீங்கள் உலகெங்கும் காண்கிறீர்கள். ஆம், உலகெங்கும் இக்கொள்கை பரவப்பரவ அதன் தாக்கத்தினால் ஒருகாலத்தில் ஜாதி, நிறம் இடம் போன்றவற்றால் பிளவுண்டு கிடந்த சமூகங்கள் பள்ளிவாசல்களில் அணியணியாக அணிவகுப்பதிலும் ஒரே சீருடையில் ஹஜ்ஜின் போது சங்கமிப்பதிலும் காண்கிறீர்கள்   

திருக்குர்ஆன் இறங்கிய வரலாறு

முஹம்மத் நபி அவர்கள் குரைஷிப் பரம்ரையில் அப்துல்லாஹ் ஆமினா தம்பதியினருக்கு கி.பி. 571ல் மக்கா நகரில் பிறந்தார்கள். இவர்கள் தாயின் வயிற்றில் இருக்கும் போது தந்தையாரையும், பிறந்து சில மாதங்களில் தனது தாயாரையும் இழந்தார்கள். அநாதையான இவரை அவர்களின் சிறிய தந்தை அபூதாலிப் என்பவர் பெறுப்பேற்று வளர்த்தார்கள்.அநதையாகவே வளர்ந்தாலும் நற்பண்புள்ளவராகவும் உண்மையாளராகவும் திகழ்ந்த இவரை மக்கள் அல் அமீன் (பொருள்: நம்பிக்கைக்கு உரியவர்) என்று பட்டம் சூட்டி அழைத்தனர்.

ஆனால் அவரைச்சுற்றி அனாசாரங்களும் மூடநம்பிக்கைகளும் அநியாயங்களும் அட்டூழியங்களும் வெகுவாகப் பரவியிருந்தன. அங்கு மக்கள்  முன்னோர்கள் விட்டுச்சென்ற முடமான பழக்கவழக்கங்களை கண்மூடித்தனமாகப் பின்பற்றி வந்தனர். யாரென்றே தெரியாதவர்களுக்கு எல்லாம் சிலைகள் வைத்து வணங்கினார்கள். கடவுளின் பெயரால் புரோகிதர்கள் கற்பித்த மூடநம்பிக்கைகளையும் வீண் சடங்குகளையும் மறுகேள்வி கேட்காமல் பின்பற்றினார்கள். பெண் குழந்தைகளை உயிருடன் புதைத்தனர், மது குடித்தனர், மனித உயிர்களை துச்சமாக மதித்தனர், பெண்களை அடிமைகளாக நடத்தினர், சாதராண விஷயத்திற்காக பலஆண்டுகள் தொடராக சண்டை இட்டுக் கொண்டனர்,  நிறவெறி, கோத்திரவெறி, தேசியவாதம், சாதியம் போன்ற தீமைகள் கட்டுக்கடங்காமல் மக்களை அலைக்கழித்துக் கொண்டிருந்தது

 தன்னைச் சுற்றி இவையெல்லாம் நடந்துகொண்டிருக்க நபிகள் நாயகம் இந்த நிகழ்வுகளுக்குக் காரணம் என்ன? இவற்றின் முடிவு என்ன? நாம் ஏன் வாழ்கிறோம்? நாம் எங்கே போகிறோம்? .... என்பன பற்றியெல்லாம் சிந்திக்க ஆரம்பிக்கிறார்கள். இறைவனிடம் இருந்து வழிகாட்டுதலை நாடியவர்களாக மக்காவின் அருகே ஹிரா என்ற மலையில் ஒரு குகைக்குள் தனிமையில் தங்குகிறார்கள். இவ்வாறு இருக்கையில் ஒருநாள் ஜிப்ரீல் என்ற வானவர் அங்கு இறைவனிடமிருந்து வேத வசனங்களைத் தாங்கி வருகிறார்... 

ஆம் அன்றுதான் முஹம்மது (ஸல்) அவர்கள் இறைவனின் தூதராகத் தேர்ந்தெடுக்கப்பட்ட நாள்! முதன் முதலாக இறைவன் புறத்திலிருந்து இறங்கிய வசனங்கள் இவையே: 
 (முஹம்மதே!) படைத்த உமது இறைவனின் பெயரால் ஓதுவீராக! அவன் மனிதனை கருவுற்ற சினை முட்டையிலிருந்து படைத்தான். ஓதுவீராக! உமது இறைவன் கண்ணியமானவன். அவனே எழுது கோலால் கற்றுத் தந்தான். அறியாதவற்றை மனிதனுக்குக் கற்றுத் தந்தான். (திருக்குர்ஆன் 96:1-5)
இவற்றைத் தொடர்ந்து வந்த இறைக் கட்டளைகளின் அடிப்படையில் நபிகள்நாயகம் (ஸல்) அவர்கள் தமது நாற்பதாம் வயதில் தம்மைக் கடவுளின் தூதர் என்றுமக்களிடையே பிரகடனம் செய்தார்கள். இறைவன் புறத்திலிருந்து தான் பெறும் செய்திகளையும் எச்சரிக்கைகளையும் மக்களுக்கு எடுத்துச் சொன்னார்கள்.  ஜிப்ரீல் என்ற வானவர் மூலம் நபிகளாருக்கு இறைவன் புறத்திலிருந்து வேதவசனங்களும் இறைகட்டளைகளும் வழிகாட்டுதல்களும் வரத் துவங்கின.  

முஹம்மது நபியவர்கள் 40-ஆவது வயதில் இறைத்தூதராக ஆனது முதல் 63-ஆவது வயதில் மரணமடையும் வரை அவருக்கு அவ்வப்போது சிறிது சிறிதாக ஒலிவடிவில் அருளப்பட்ட வசனங்களின் தொகுப்பே திருக்குர்ஆன் என்பது.

திருக்குர்ஆன் பாதுகாக்கப்படும் விதம் 

 இறைவன் புறத்திலிருந்து வானவர் ஜிப்ரீல் இவ்வசனங்களை கொண்டு வந்து நபிகளாருக்கு ஓதிக்  காட்டுவார்கள். நபிகளாரோ எழுதவோ படிக்கவோ அறியாதவர்.  தனக்கு முன் ஓதப்படும் வசனங்களை மனப்பாடம் செய்து கொள்வார் நபிகளார். அது இறைவனுடைய ஏற்பாடு. தொடர்ந்து ஜிப்ரீலிடம் தான் செவியுற்ற வசனங்களை தனது தோழர்கள் முன் ஓதிக் காட்டுவார்கள். அவற்றை தோல்களிலும் எலும்புகளிலும் எழுதி வைத்துக் கொண்டனர் நபித்தோழர்கள். அது மட்டுமல்ல அவ்வசனங்களின் கவர்ச்சியில் தங்களைப் பறிகொடுத்த தோழர்கள் அவற்றை தொழுகையிலும் தொழுகைக்கு வெளியேயும் அடிக்கடி ஓதும் பழக்கமுடையோரானார்கள். அதாவது ஒலி வடிவிலேயே திருக்குர்ஆன் வசனங்கள் பிரபலமாகின.

இதைப் புரிந்துக்கொள்ள ஒரு சிறு உதாரணத்தைக் கூறுவோம். தமிழில் பழைய திரைப்படப் பாடல்கள் எதையாவது எடுத்துக்கொள்ளுங்கள். ‘பாலும் பழமும் கைகளிலேந்தி.......” அல்லது“நான் ஆணையிட்டால்...” போன்ற பாடல்களை நீங்கள் அறிவீர்கள். அவை இயற்றப்பட்டு வருடங்கள் நாற்பதுக்கு மேலாகியும் அவை இன்றும் அவ்வாறே பாடப்படுவதைக் காண்கிறோமல்லவா? ஒலிவடிவிலேயே அவை மக்களிடையே பிரபலாமானதுதான் அதற்குக்காரணம். அவ்வாறுதான் திருக்குர்ஆன் வசனங்களும் முஸ்லிம்களிடையே பிரபலமாகின.

 புண்ணியம் கருதியும் தொடர்ந்த ஓதலின் காரணமாகவும்  பலரும் குர்ஆன் வசனங்களை  மனப்பாடம்   செய்தனர். குர்ஆன் என்ற வார்த்தையின் பொருளே ‘ஓதப்படுவது’ என்பதே!

ஆம், அருளப்பட்ட நாள் முதல் இன்று வரை திருக்குர்ஆனை அதிகமதிகமாக ஒதிவருவது உலகெங்கும் முஸ்லிம்களின் பழக்கமாக உள்ளது.

  உலகிலேயே மிக மிக அதிகமாக மூல மொழியில் ஓதப்பட்ட மற்றும் ஓதப்படும் நூல் திருக்குர்ஆன் மட்டுமே! குறிப்பாக ரமலான் மாதம் பகலில் விரதமிருந்து இரவில் நின்று தொழுவது இஸ்லாமிய கடமை என்பதை கேட்டிருப்பீர்கள். இரவில் நீண்ட நேர தொழுகைகளில் இமாமாக நிற்பவர் 30 நாட்களில் முழு குர்ஆனையும் ஓதி முடிப்பது வழக்கம். அந்த அளவுக்கு இமாம்கள் முழு குர்ஆனையும் மனப்பாடம் செய்திருப்பார்கள். அவ்வாறு முழு குர்ஆனையும் மனப்பாடம் செய்தவர்கள் ஆயிரக்கணக்கில் அன்றும் இருந்தார்கள். இலட்சக் கணக்கில் இன்றும் இருக்கிறார்கள். கோடிக் கணக்கில் நாளையும் இருப்பார்கள், (இன்ஷாஅல்லாஹ்)! இவ்வாறு முழு குர்ஆனும் ஒலி வடிவில் உலகெங்கும் உலா வருகிறது. மனித மனங்களிலேயே பாதுகாக்கவும் படுகிறது. இதைப் பற்றி இறைவனும் குர்ஆனில் குறிப்பிடுகிறான்:

“நிச்சயமாக நாமே இந்த நினைவூட்டலை (குர்ஆனை) இறக்கியிருக்கிறோம். நிச்சயமாக நாமே இதைப் பாதுகாப்போம்” (திருக்குர்ஆன் 15:9)

இப்படியும் இந்த உண்மையை புரிந்து கொள்ளலாம்- இன்று உலகில் காணும் குர்ஆன்,பைபிள, பகவத்கீதை, உள்ளிட்ட எல்லா வேதபுத்தகங்களையும் மற்ற புத்தகங்களையும் குறுந்தகடுகளையும் எல்லாம் திரட்டி ஒரு மூலையில் இட்டு தீக்கிரையாக்கினாலும்,மறுபடியும் திரும்ப எழுதப் படக்கூடிய ஒரே புத்தகம் திருக்குர்ஆன் மட்டுமே! காரணம் உலகெங்கும் உள்ள இலட்சக் கணக்கான மக்கள் மனங்களில் அது ஒரே போல பதிவாகி இருப்பதேயாகும்! மேற்படி இறைவனின் வாக்குறுதி புலர்ந்து வருவது புலப்படுகிறது அல்லவா?

. 

முந்தைய வேதங்கள் ஏன் பாதுக்காக்கப்படவில்லை?

இப்போது உங்கள் மனங்களில் எழும் ஒரு சந்தேகத்தையும் ஆராய்வோம். முந்தைய இறைவேதங்களும் இறைவனால் அருளப் பட்டவைதானே, அவை ஏன் பாதுகாக்கப்படவில்லை?

அவை ஒரு குறிப்பிட்ட காலகட்டத்துக்காக குறிப்பிட்ட மக்களுக்காக அனுப்பப்பட்டவையாக இருந்தன என்பதே அதற்குக் காரணம். உதாரணமாக ஒரு நாட்டின் அரசியல் சாசனம் புதுப்பிக்கப் படும்போது பழையது காலாவதியாகி மதிப்பற்றவையாகி விடுகிறதல்லாவா?அதேபோலத்தான் முந்தைய வேதங்கள் காலாவதியாகிப் போனதனால் அவை பாதுகாக்கப் படவில்லை.

மாறாக திருக்குர்ஆன் ஏன் பாதுகாக்கப் படுகிறது?

இது இறைவனின் இறுதிவேதம். இறுதிநாள் வரை இனி வரப்போகும் மக்களுக்கு இதுதான் இறை வழிகாட்டுதல். இதன் அடிப்படையிலேயே மறுமை நாளில் நம் பாவபுண்ணியங்கள் தீர்மானிக்கப்படும்

இஸ்லாம் எவ்வாறு அடிமைகளை விடுவித்தது?

படைத்த இறைவனுக்குக் கீழ்படிந்து வாழுதலையே அரபு மொழியில் இஸ்லாம் என்கிறோம். அவ்வாறு கீழ்ப்படிந்து வாழ்பவர் யாராகினும் அவருக்கே முஸ்லிம் (அதாவது கீழ்படிபவர்) என்று கூறப்படும். ஏக இறைவனை மட்டும் வணக்கத்துக்கு உரியவனாக ஏற்று அவன் வழங்கும் வேதத்தையும் அவனது தூதரையும் வழிகாட்டிகளாக ஏற்றுக்கொண்டால் மனித வாழ்வில் மாபெரும் புரட்சிகள் ஏற்ப்படும். மனித சமூகத்தில் மாபெரும் மாற்றங்கள் நிகழும். மனித உரிமைகள் மீட்டப்பட்டும், அடிமைத்தளையிலிருந்து விடுவிக்கப் பட்டு மனிதன் சுதந்திரக் காற்றை சுவாசிப்பான். 

மட்டுமல்ல, மானிட சமத்துவத்தையும் அனுபவிப்பான்.

இஸ்லாம் மூன்று அடிப்படைகளை மனித மனங்களில் ஆழவிதைப்பதன் மூலம் சமூகத்தில் யாராலும் சாதிக்கமுடியாத புரட்சிகளை நிகழ்த்துகிறது. அவை இவையே;

1) ஒன்றே மனித குலம் 2) அனைவருக்கும் ஒருவன் மட்டுமே இறைவன் 3) அவனிடமே மீழுதல், அவனுக்கு பதில் சொல்லியாக வேண்டும். இதன் மூலம் மனித சகோதரத்துவமும் சமத்துவமும் வளர்வதோடு மனித உறவுகளையும் உரிமைகளையும் பேணினால் இறைவன் மறுமையில் சொர்க்கம் கொண்டு பரிசளிப்பான் என்ற உணர்வால் மனிதன் ஊக்குவிக்கப் படுகிறான். அதற்காக தியாகங்கள் மேற்கொள்ளவும் துணிகிறான். 

மனித சமூகத்தில் அன்று புரையோடிப் போயிருந்த அடிமைத்தளையிலிருந்து மனிதனை எவ்வாறு மெல்லமெல்ல விடுவித்தது என்பதற்கு ஏராளமான சம்பவங்களை மனித வரலாறு பதிவு செய்துள்ளது. விரிவஞ்சி ஒரே ஒரு உதாரணத்தை மட்டும் மூலம் காண்போம்:

மஃரூர் என்பார் ஒரு நபித்தொழரைப் பற்றிக் கூறுகிறார் :
'நான் நபித்தோழர் அபூதர் (ரலி) அவர்களை மதீனாவிற்கு அருகிலுள்ள 'ரபதா' என்ற இடத்தில் சந்தித்தேன். அப்போது அவரின் மீது ஒரு ஜோடி ஆடையும் (அவ்வாறே) அவரின் அடிமை மீது ஒரு ஜோடி ஆடையும் கிடப்பதைப் பார்த்தேன். நான் ஆச்சரியமுற்றவனாக அதைப் பற்றி அவரிடம் கேட்டதற்கு, 'நான் (ஒருமுறை) ஒரு மனிதரை ஏசிவிட்டு அவரின் தாயையும் குறை கூறி விட்டேன். அப்போது நபியவர்கள் கூறினார்கள்: 'அபூதர், அவரையும் தாயையும் சேர்த்துக் குறை கூறி விட்டீரே! நீர் அறியாமைக் காலத்துப் பழக்கம் குடி கொண்டிருக்கும் மனிதராகவே இருக்கிறீர்! உங்களுடைய அடிமைகள் உங்களின் சகோதரர்களாவர்.அல்லாஹ்தான் அவர்களை உங்கள் அதிகாரத்தின் கீழ் வைத்திருக்கிறான். எனவே ஒருவரின் சகோதரர் அவரின் அதிகாரத்தின் கீழ் இருந்தால் அவர், தாம் உண்பதிலிருந்து அவருக்கும் புசிக்கக் கொடுக்கட்டும். தாம் உடுத்துவதிலிருந்து அவருக்கும் உடுத்தக் கொடுக்கட்டும். அவர்களின் சக்திக்கு மீறிய பணிகளைக் கொடுத்து அவர்களைச் சிரமப்படுத்த வேண்டாம். அவ்வாறு அவர்களை நீங்கள் சிரமமான பணியில் ஈடுபடுத்தினால் நீங்கள் அவர்களுக்கு உதவியாயிருங்கள்' என்று இறைத்தூதர்(ஸல்)அவர்கள் கூறினார்கள்' (இதனால்தான் நான் அணிவது போல் என் அடிமைக்கும் உடை அளித்தேன்" என அபூதர் கூறினார்" .[ஆதாரம் : புஹாரி எண் 30 ]

 அதாவது ஏஜமானனையும் அடிமையையும் ஒரேவிதமான ஆடையில் அவர் கண்ட காட்சி அவரை ஆச்சரியத்துக்கு உள்ளாக்கியது. விசாரித்ததில் நபிகளாரின் கண்டிப்பும் உபதேசமுமே அதற்குக் காரணம் என்பதை அவர் அறிய வருகிறார். நபிகளாரின் உபதேசத்தில் கவனிக்க வேண்டிய உண்மைகள்:

= அடிமைகளும் இறைவனால் படைக்கப் பட்ட மனிதர்களே – அவர்கள் உங்கள் சகோதரர்களே!

= அந்த இறைவன்தான் அவர்களை உங்கள் ஆதிக்கத்திற்குக் கீழ் கொண்டுவந்துள்ளான்.

= எனவே அந்த இறைவனின் பொருத்தம் உங்கள் மீது உண்டாக வேண்டுமானால் நீங்கள் அவர்களை உங்கள் சகோதரர்களாகவே பாவித்து நீங்க அனுபவிக்கும் சுகங்களை அவர்களும் அனுபவிக்கச் செய்யவேண்டும்.

= அவர்களுக்கு சிரமமான பணிகளைக் கொடுத்தால் கூடவே உதவவும் செய்ய வேண்டும்.

மேற்படி சம்பவம் ஒரு உதாரணம் மட்டுமே. இஸ்லாம் என்ற சீர்திருத்த இயக்கம் இவ்வாறுதான் சரித்திரத்தில் பல புரட்சிகளைச் செய்து வந்தது. தொடர்ந்து செய்து வருகிறது! எங்கெல்லாம் இக்கொள்கை நுழைகிறதோ அங்கெல்லாம் மனித உரிமைகள் மறுமலர்ச்சி பெறுகின்றன. மானிட சுதந்திரமும் சமத்துவமும் சகோதரத்துவமும் நிலைநாட்டப் படுகின்றன.

சுற்றுலாக்களும் படிப்பினைகளும்

இயற்கை அழகை இரசிக்கவும் அவற்றில் அமைதியைக் காணவும்  கோடைவாசத் தலங்கள் நோக்கி நாம் பயணங்கள் மேற்கொள்ளும் காலம் இது!

மலையும் மடுவும் ஆறும் அருவிகளும் அவைகளின் சலசலப்பும்.....

மரங்களும் செடிகளும் கொடிகளும் தென்றலும் வசந்தமும்....

காய்களும் கனிகளும் மலர்களும் மொட்டுக்களும் மகரந்தமும்.....

அப்பப்பா... நிறத்தாலும் மணத்தாலும் சுவையாலும் எவ்வாறெல்லாம் நமக்கு இன்பமூட்டுகின்றன அவை! பசுமைக் கம்பளத்தின் மீது வண்ணங்களை வாரித்தெளித்த மலர்களும் நம் தலைக்கு மேலே குடைபிடிக்கும் வான்முகில்களும் ஆரத்தழுவும் தென்றலும்.....என்றுமே தொடரக் கூடாதா இவை? என்ற ஏக்கம் ஒவ்வொருவருக்கும் இருக்கவே செய்கிறது. இருப்பினும் வாழ்வின் உண்மைகளை நாம் மறக்கவோ அலட்சியம் செய்யவோ முடிவதில்லை. இவற்றை விட்டு விட்டு மீண்டும் பிழைப்புக்காக ஊர் திரும்பியாக வேண்டும்.

ஆனால் இந்த தற்காலிக இன்பங்கள் பின்னால் வர இருக்கின்ற ஒரு நிரந்தர இன்பங்கள் நிறைந்த ஒரு வாழ்விடத்தின் ஒரு சிறு மாதிரியே (sample) என்பதை சிந்திப்போர் உணரலாம். அதைப் பற்றி திருக்குர்ஆனில் நம்மைப் படைத்தவன் இவ்வாறு கூறுகிறான்:

29:58 எவர்கள் இறைநம்பிக்கை கொண்டு, நற்காரியங்கள் செய்கிறார்களோ அவர்களை, சதா கீழே ஆறுகள் ஓடிக்கொண்டிருக்கும் சுவனபதியிலுள்ள உயர்ந்த மாளிகைகளில், நிச்சயமாக நாம் அமர்த்துவோம். அவற்றில் அவர்கள்நிரந்தரமாக (நிலைத்து) இருப்பார்கள். (இவ்வாறாக நற்)செயல்கள் புரிவோரின் கூலியும் பாக்கியம் மிக்கதாகவே உள்ளது.

அந்த வாழ்விடம் தற்காலிகமானது அல்ல. நிரந்தரமானது.

43:71 பொன் தட்டுகளும், கிண்ணங்களும் அவர்களைச் சுற்றிக் கொண்டேயிருக்கும். இன்னும் அங்கு அவர்கள் மனம் விரும்பியதும், கண்களுக்கு இன்பம் தருவதும் அதிலுள்ளன.  இன்னும், 'நீங்கள் இங்கு என்றென்றும் தங்கியிருப்பீர்கள்!' (என அவர்களிடம் சொல்லப்படும்.)

ஆனால் அங்கு செல்ல வேண்டுமானால் நாம் இறைவன் மீதும் அவன் தூதர்கள் மீதும் வேதங்கள் மீதும் நம்பிக்கை கொண்டு நல்லறங்கள் புரிய வேண்டும். அவ்வாறு செய்வோரையே பயபக்தியுடையவர்கள் என்று திருக்குர்ஆன் கூறுகிறது. இறைவனின் செய்திகளைப் புறக்கணித்து தான்தோன்றித்தனமாக நடந்தவர்களைப் போல ஆக மாட்டார்கள் என்று திருக்குர்ஆன் கூறுகிறது.

47:15 பயபக்தியுடையவர்களுக்கு வாக்களிக்கப்பட்டுள்ள சுவர்க்கத்தின் உதாரணமாவது: அதில் மாறுபடாத தெளிந்த நீரைக் கொண்ட ஆறுகளும், தன் சுவை மாறாத பாலாறுகளும், அருந்துவோருக்கு இன்பமளிக்கும் மது ரச ஆறுகளும், தெளிவான தேன் ஆறுகளும் இருக்கின்றன. இன்னும், அதில் அவர்களுக்கு எல்லா விதமான கனிவகைகளும், தங்கள் இறைவனின் மன்னிப்பும் உண்டு. (இத்தகையோர்) நரகத்தில் எவன் என்றென்றுமே தங்கியிருந்து, கொதிக்கும் நீர் புகட்டப்பட்டு (அதனால்) குடல்களெல்லாம் துண்டு துண்டாகிவிடுமோ அவனுக்கு ஒப்பாவாரா?

இயற்கை அழகு இறைவனின் கைவண்ணமே!

இறைவனின் உள்ளமை பற்றியும் அவனது திட்டங்கள் பற்றிய பாடங்களைத் தாங்கி நிற்கின்றன இயற்க்கை காட்சிகள்:

3:190. நிச்சயமாக, வானங்கள், பூமி ஆகியவற்றின் படைப்பிலும்; இரவும், பகலும் மாறி மாறி வருவதிலும் அறிவுடையோருக்கு திடமாக அத்தாட்சிகள் பல இருக்கின்றன.

16:12. இன்னும் அவனே இரவையும், பகலையும், சூரியனையும், சந்திரனையும் உங்க(ள் நலன்க)ளுக்கு வசப்படுத்திக் கொடுத்துள்ளான்; அவ்வாறே நட்சத்திரங்களும் அவன் கட்டளைப் படியே வசப்படுத்தப்பட்டுள்ளன - நிச்சயமாக இதிலும் ஆய்ந்தறியக்கூடிய மக்கள் கூட்டத்தாருக்கு(த் தக்க) அத்தாட்சிகள் இருக்கின்றன.

16:13. இன்னும், பூமியில் அவன் படைத்திருப்பன பல விதமான நிறங்களையுடைய (செடி கொடிகள், பிராணிகள், பறவைகள், போன்ற)வையுமாகும்; நிச்சயமாக இதில் (இறைவனின் அருட்கொடைகளை நன்றியுடன்) நினைவு கூரும் மக்களுக்கு அத்தாட்சியுள்ளது.

வரலாற்றுச்சுவடுகள்

சுற்றுலாக்களின் போது சரித்திரப்புகழ் வாய்ந்த பலவிதமான நினைவிடங்களையும் காண்கிறோம். நமக்கு முன்னர் இங்கு வாழ்ந்து சென்ற முன்னோர்களின் கைவண்ணங்களில் உருவான அவர்களின் மாளிகைகள், அரண்மனைகள், பாறைகளைக் குடைந்து அவர்கள் உண்டாக்கிய சிற்பங்கள், குகைகள் மற்றும் வழிபாட்டுத்தலங்கள் என பலவற்றையும் நாம் காண்கிறோம்.

இவற்றில் இருந்து நாம் பெறும் பாடங்கள் என்ன?

நம்மில் பலரும் அவற்றில் கலை அழகு கண்டு வியக்கிறோம். அவர்கள் நம் நாட்டினர் என்பதற்காக பெருமை கொள்கிறோம். அதேவேளையில் நாம் சிந்திக்கவேண்டிய மற்றொரு விடயமும் உள்ளது...

அவர்களின் நிலை இப்போது என்ன? என்பதே அந்த சிந்தனை....

= அவர்கள் இப்பூமியில் தங்கள் வாழ்வு நிலையானது என்று எண்ணினார்கள். அதனால்தான் பாறைகளைக் குடைந்தும் தங்கள் வாழ்விடங்களை ஏற்படுத்திக் கொண்டார்கள். ஆனால் இன்று அவற்றில் அவர்களைக் காணவில்லை!

= அவர்களில் சிலர் தங்கள் செல்வம் தங்களை நிலைத்திருக்க வைக்கும் என்று எண்ணினார்கள். அதனால்தான் நாட்டு செல்வங்களை அரண்மனைக்குள் சேமித்தார்கள். ஆனால் திரண்ட செல்வங்களை அனுபவிக்க அவர்களின் உடல்கள் இன்று இல்லை.

= தங்கள் புகழை நாடும் நாளைய தலைமுறையும் என்றென்றும் ஓத வேண்டும் என்று விரும்பியே கலைவண்ணம் மிக்க நினைவுச்சின்னங்களை சமைத்தார்கள். ஆனால் அதைக் காணவும் கேட்கவும் அவர்கள் இங்கு இல்லை.

= இறந்துபோன மனைவிக்கு பளிங்குக் கற்களால் மாளிகை கட்டி அழகுபார்த்தவர்களும் அவர்களில் உண்டு. அந்த மாளிகைகளின் அழகை ரசிப்பவர்கள் இன்று உண்டு. ஆனால் அவர்கள் இன்று இல்லை.

= தங்களைக் நீடூழி வாழவைக்கும் என்று தங்கள் இஷ்ட தெய்வங்களாகக் கருதியவற்றுக்கு சிற்பங்கள் வடித்தவர்களும் நம் முன்னோரில் உண்டு. அது பொய்க்கும் என்று அவர்கள் எண்ணிப்பார்க்கவே இல்லை.

ஆம் அன்பர்களே, இன்று சரித்திரங்களில் வைர வரிகளால் புகழப்படும் நமது முன்னோர்கள் தங்களுக்கு அப்படியொரு திடீர் முடிவுரை எழுதப்படும் என்றும் எதிர்பார்த்திருக்கவில்லை! 

ஒவ்வோர் ஆத்மாவும் மரணத்தைச் சுகித்தே ஆகவேண்டும்; அன்றியும் - இறுதித் தீர்ப்பு நாளில் தான், உங்க(ள் செய்கைக)ளுக்குரிய பிரதி பலன்கள் முழுமையாகக் கொடுக்கப்படும்;. எனவே எவர் (நரக) நெருப்பிலிருந்து பாதுகாக்கப்பட்டுச் சுவர்க்கத்தில் பிரவேசிக்குமாறு செய்யப்படுகிறாரோ. அவர் நிச்சயமாக வெற்றியடைந்து விட்டார்;.இவ்வுலக வாழ்க்கை மயக்கத்தை அளிக்கவல்ல (அற்ப இன்பப்) பொருளேயன்றி வேறில்லை. (திருக்குர்ஆன் 3:185)

இந்த உண்மையையும் அவர்களில் பெரும்பாலோர் உணர்ந்திருக்கவில்லை என்பதுதான் நம்மை துக்கத்தில் ஆழ்த்துகிறது.

''பூமியில் நீங்கள் சுற்றி வந்து, இறை வசனங்களைப் பொய்ப்பித்தவர்களின் முடிவு என்ன ஆயிற்று என்பதை நீங்கள் கவனித்துப் பாருங்கள்'' என்று (நபியே!) நீர் கூறுவீராக. (திருக்குர்ஆன் 6:11.)