இந்த வலைப்பதிவில் தேடு

ஞாயிறு, 22 மே, 2022

நாத்திகப் பேராசிரியருக்கு நேர்ந்தது என்ன?

டாக்டர் ஜெப்ரி லேங் (Dr.Jeffrey Lang), அமெரிக்காவின் கன்சாஸ் பல்கலைகழகத்தில் (University of Kansas) கணிதத்துறை பேராசிரியராய் இருப்பவர். தன் பதினாறு வயதிலிருந்து தன் 28 ஆவது நாத்திகராக இருந்தவர்.  இவருக்கு நேர்ந்த மனமாற்றத்தை அவரே கூறுவதைக் கேட்போம்:

ஒருநாள் ஓய்வு நேரம். என்னிடம் இருந்த அனைத்து புத்தகங்களையும் படித்தாகி விட்டது, புதிதாக படிப்பதற்கு ஒன்றுமில்லை. அப்போது, மேசையில் இருந்த குரான் கண்ணில் பட்டது. 

வீட்டில் போரடிக்கும் போது, ஒரு வார இதழை எடுத்து நாலு பக்கங்களை புரட்டி பின்னர் வைத்துவிடுவோமே, அதுபோல நினைத்துதான் குரானைத் திறந்தேன். 

குர்ஆனில் குறை கண்டுபிடிக்க வேண்டுமென்ற எண்ணமெல்லாம் இல்லை. என்னைப் பொறுத்தவரை கடவுள் இல்லை, அவ்வளவுதான். இது மற்றுமொரு புத்தகம், அவ்வளவே...      
முதல் அத்தியாயத்தை பார்த்தேன், அல் பாத்திஹா என்றிருந்தது. அதில் ஏழு வசனங்கள். நல்ல அழகான, கோர்வையான வசனங்கள். முஸ்லிம்கள் குரானை இறைவேதமென்று சொன்னாலும், என்னைப் பொறுத்தவரை அது மனிதரால் எழுதப்பட்டது. அதனால், இந்த புத்தகத்தை எழுதியவர் நல்ல இலக்கியவாதி என்று பாராட்டினேன். நல்ல புத்திசாலி என்றும் நினைத்தேன், படிப்பவர்களை துவக்கத்திலேயே நன்றாக கட்டிப்போடுகிறாரே...

அதில் ஒரு வசனம்

தீர்ப்பு நாளின் அதிபதி --- (திருக்குர்ஆன் 1:3)  

என்ன தீர்ப்பு நாளா?, இவரே மக்களுக்கு கஷ்டத்தை கொடுப்பாராம், இவரே தீர்ப்பு சொல்லுவாராம் என்று கோபப்பட்டேன்...

முதல் சூரா என்னை மேற்கொண்டு படிக்க தூண்டியது. அடுத்த அத்தியாயம், சூரத்துல் பகரா...

அதன் இரண்டாது வசனம்

இது திரு வேதமாகும்; இதில் எத்தகைய சந்தேகமும் இல்லை. பயபக்தியுடையோருக்கு நேர்வழி காட்டியாகும். --- Qur'an 2:2

என்ன ஒரு அதிகார தோரணை என்று வியந்தேன். நிச்சயமாக இந்த புத்தகத்தை எழுதியவர் அறிவாளிதான். அதுமட்டுமல்லாமல் ஒரு அறிவுசார்ந்த விவாதத்திற்கு தயார்படுத்தின அந்த வசனங்கள்.   

படித்துக்கொண்டே வந்தேன். அந்த சூராவின் முப்பதாவது (30) வசனம் ஒரு கனம் என்னை திக்குமுக்காட செய்தது. ஏனென்றால் என் மனதில் நீண்ட நாட்களாக இருந்த கேள்வி அங்கு கேட்கப்பட்டிருந்தது. 

ஏன் கடவுள் அநியாயக்கார மனிதனை படைக்க வேண்டும்என்ற கேள்விதான் அது...   

என்னுடைய கேள்வியை இங்கே வானவர்கள் கேட்கின்றனர்.     

இன்னும், உம் இறைவன் வானவர்களை நோக்கி "நிச்சயமாக நான் பூமியில் ஒரு பிரதிநிதியை அமைக்கப் போகிறேன்" என்று கூறியபோது, அவர்கள் "நீ அதில் குழப்பத்தை உண்டாக்கி ரத்தம் சிந்துவோரையா அமைக்கப்போகிறாய்? இன்னும் நாங்களோ உன் புகழ் ஓதியவர்களாக உன்னை துதித்து, உன் பரிசுத்தத்தைப் போற்றியவர்களாக இருக்கின்றோம்" என்று கூறினார்கள்.          --- Qur'an 2:30            

இந்த ஒரு வசனம் என் மனதில் பெரும் தாக்கத்தை ஏற்படுத்தியது. 
நான் நாத்திகனாக மாறியதில் இந்த ஒரு கேள்விக்கு நிச்சயம் முக்கிய பங்குண்டு. 

வானவர்கள் கேட்பது நியாயம்தானே?. அவர்களோ தவறு செய்யாதவர்கள், இறைவனுக்கு கட்டுப்பட்டவர்கள், அவர்களையே பூமியில் வாழ வைத்திருக்கலாமே? ஏன் இந்த அநியாயக்கார மனிதனை படைக்க வேண்டும்? வானவர்களின் கேள்வி மிக நியாயமானது...இதற்கு என்ன பதில் என்று ஆர்வமுடன் மேற்கொண்டு படித்தேன். 

அதே வசனத்தின் இறுதியில்

அவன் " நீங்கள் அறியாதவற்றையெல்லாம் நிச்சயமாக நான் அறிவேன்" எனக் கூறினான் --- Qur'an 2:30. 

என்ன நீ அறிவாயா? ஏன் பாவம் செய்யக்கூடிய மனிதர்களை படைத்தாய் என்று கேட்டால், அதற்கு அனைத்தையும் நீ அறிவாய் என்பதுதான் பதிலா

இப்போது குரானுடன் நான் வாக்குவாதம் செய்ய ஆரம்பித்துவிட்டேன் (சிரிக்கிறார்), இந்த குரானை முழுமையாக படித்து என் மற்ற கேள்விகளுக்கும் என்ன பதிலளிக்கிறது என்று பார்த்து விட வேண்டியதுதான் என்று முடிவெடுத்துக் கொண்டேன்.   

நாலு பக்கங்கள் மட்டுமே திருப்பலாம் என்றிருந்தவனை இந்த குரான் மென்மேலும் படிக்க தூண்டிக்கொண்டே இருந்தது, என்னுடைய கேள்விகள் ஒவ்வொன்றாய் பதிலளிக்கப்பட்டு கொண்டே வந்தன.          

என் அனுபவங்களை முழுமையாக சொல்ல இந்த நேர்க்காணல் நேரம் போதாது. ஆனால் நான் சொல்ல விரும்புவதெல்லாம், குரானை முழுமையாக படித்த பிறகு, தனிப்பட்டமுறையில் என் கேள்விகளுக்கு விடைகள் கிடைத்தன. 

குரானின் வசனங்கள் ஆணித்தரமானவை, ஆழ்ந்த கருத்துக்களை கொண்டவை. 

பிறகு, என் இருபத்தி எட்டாவது வயதில் இஸ்லாத்தை ஏற்றுக்கொண்டேன். 

ஒருமுறை என் மகள் கேட்டாள்

"சரி dad, குரான் உங்கள் கேள்விகளுக்கு பதிலளித்து விட்டது. ஆனால், உங்கள் கேள்விகளுக்கெல்லாம் ஒரு புத்தகம் பதிலளித்து விட்டால் மட்டும் இறைவன் இருக்கிறானென்று ஆகிவிடுமா, அல்லது அந்த புத்தகம் இறைவனிடமிருந்து வந்துவிட்டதாக தான் நீங்கள் நினைத்துவிட முடியுமா?" 

இது என்னிடம் பலரும் கேட்க நினைக்கக்கூடிய அர்த்தமுள்ள கேள்வி.  

நான் குரானை மென்மேலும் படிக்க படிக்க, என் கேள்விகளுக்கு பதில்கள் கிடைக்க துவங்கின. பதில்கள் கிடைக்க கிடைக்க நாத்திகத்தை கேள்வி கேட்க ஆரம்பித்துவிட்டேன்.    

நான் எந்த அளவு குரானை மேற்கொண்டு படித்தேனோ அந்த அளவு நாத்திகத்தை கேள்வி கேட்க ஆரம்பித்துவிட்டேன். 

நான் கடவுள் இல்லை என்பதில் மிக உறுதியாய் இருந்தவன், யார் எப்படி விளக்கினாலும் கடவுள் இல்லை என்பதில் நின்றவன். 
ஆனால் குரான், அதனைப்பற்றி நிறைய கேள்விகளை எழுப்பிவிட்டது. 

அதுமட்டுமல்லாமல், குரானைப் படித்து முடித்ததும் என் மனதில் ஏற்பட்ட அமைதி இருக்கிறதே, இதுநாள் வரை என் வாழ்வில் அனுபவிக்காதது. இறைவனின் அன்பு என்பது இதுதானோ? சில நேரங்களில் அந்த உணர்வு பத்து, பதினைந்து நிமிடங்கள் கூட நிலைத்திருக்கும். என் மனம் அமைதியடைந்தது, ஒரு அற்புதமான உணர்ச்சி அது.  

என் வாழ்நாளில் கஷ்டங்களை அதிகம் பார்த்தவன், அந்த அற்புத மன அமைதி எனக்கு பதிலளித்துவிட்டது, இறைவன் இருக்கிறானென்று, இது இறைவேதமென்று. 
குரானை ஓதும்போது பலமுறை கண்கலங்கியிருக்கிறேன், அன்பு என்றால் என்னவென்று புரியவைத்தது குரான் தான்.
பலரும் என்னிடம் கேட்பார்கள், "இஸ்லாத்தை ஏற்றுக்கொண்டதால் உங்கள் வாழ்வில் என்ன திருப்பம் வந்துவிட்டது" என்று.
நான் இப்போது சக மனிதர்களை அதிகம் நேசிக்க ஆரம்பித்திருக்கிறேன். இதுதான் இஸ்லாம் எனக்கு கற்றுகொடுத்த முதல் பாடம்.

தற்போது மனைவி, மூன்று குழந்தைகள் என்று ஒரு நிறைவான வாழ்வை இறைவன் எனக்கு அளித்திருக்கிறான்.  

இஸ்லாத்தை ஏற்ற புதிதில், விடியற்காலை தொழுகைக்கும், மாலை நேர தொழுகைகளுக்கும் பள்ளியில் சென்று தொழுது வருவேன். குரான் ஓதப்படுவதை கேட்பது ஒரு மிக அழகான உணர்வு.
ஒருமுறை ஒருவர் என்னிடம் கேட்டார், "டாக்டர் லேங், உங்களுக்கு அரபி புரிகிறதா?" என்று,

நான் சொன்னேன், "ஒரு குழந்தை தன் தாயை எதிர்க்கொள்கிறதே, அதுபோல தான்" என்று...

வாழ்வின் அர்த்தங்களை தேடி கொண்டிருப்போருக்கு நான் சொல்லிக்கொள்ள விரும்புவதெல்லாம் ஒன்று தான். நீங்கள் தேடுவதை தொடருங்கள், ஆனால் நேர்மையாய், திறந்த மனதுடன் தேடுங்கள். 

உங்களை என் மார்க்கத்தை ஏற்க சொல்லி கட்டாயப்படுத்தி நான் என் மார்க்கத்தை விற்க விரும்பவில்லை. முஹம்மது (ஸல்) அவர்களுக்கே அந்த உரிமையை இறைவன் வழங்கவில்லை. எடுத்து சொல்வது மட்டும்தான் எங்கள் கடமை, உங்களை நேர்வழியில் செலுத்துவதெல்லாம் இறைவனின் நாட்டம். 

அதனால் தேடுவதை தொடருங்கள்...."

நன்றி:www.ethirkural.com

------------------------------ 

அல்லாஹ் என்றால் யார்?
இஸ்லாம் ஏன் எதிர்ப்புக்குள்ளாகிறது?

ஒப்பிலா உயர்மறை திருக்குர்ஆன்!

சனி, 21 மே, 2022

சமூக சீர்திருத்தத்தில் பாங்கோசையின் பங்கு


அல்லாஹு அக்பர்அல்லாஹு அக்பர் 

அல்லாஹு அக்பர்அல்லாஹு அக்பர் 

ஒரு நாளைக்கு ஐந்து முறை, உங்களுக்கு அருகிலுள்ள பள்ளிவாசல் ஒலிபெருக்கியில் இருந்து இந்த வார்த்தைகளைக் கேட்டிருப்பீர்கள். இதை அரபு மொழியில் அதான் என்பார்கள். தமிழ் இஸ்லாமிய வழக்கில் இது ‘பாங்கு’ என்று சொல்லப்படும். ஐவேளைத் தொழுகை இஸ்லாத்தில் கடமை என்பதையும் அவற்றை இஸ்லாமியர்கள் அந்தந்த நேரங்களில் ஆங்காங்கே உள்ள பள்ளிவாசல்களில் கூட்டாக நிறைவேற்றுவதையும் அறிவீர்கள். உண்மையில் அதான் அல்லது பாங்கு என்பது பள்ளிவாசலில் நடைபெற உள்ள அந்த நேரத் தொழுகைக்கான அழைப்பே.

அதான் எப்படி தொடங்கியது?

இறைவனின் இறுதித்தூதர் முஹம்மது நபி(ஸல்) அவர்களின் காலத்தில், தொழுகைக்கு மக்களை எப்படி அழைப்பது என்பது குறித்து தன் தோழர்களோடு கலந்தாலோசனை நடத்தினார்கள்.  நபித்தோழர்கள் பலரும் பல ஆலோசனைகளை முன்வைத்தார்கள்.  சிலர் மணி அடிக்க வேண்டும் என்றும், சிலர் சங்கு ஊதலாம் என்றும், சிலர் தீ மூட்டி மக்களை அழைக்கலாம் என்றும் ஆலோசனைகள் தந்தனர். இறைவனின் வழிகாட்டுதலைத் தொடர்ந்து நபிகளார்  மனித குரலைதொழுகைக்கான அழைப்பிற்கு  பயன்படுத்தத் தேர்ந்தெடுத்தார். 

நபிகளார் மனிதக் குரலை விட அதிக சத்தமாக ஒலிக்கும் மணியையோ, சங்கையோ அல்லது தூரத்தில் இருந்தே கண்ணிற்கு தெரியும் நெருப்பையோ தேர்ந்தெடுக்கவில்லை என்பதை நீங்கள் இங்கு கவனிக்கலாம். அவர்கள் ஏன் அப்படிச் செய்தார் என்று நீங்கள் கேட்கக்கூடும். மனிதக் குரல் மூலம் கொடுக்கப்படும் தொழுகைக்கான அழைப்பு என்பது அதைச் சொல்பவருக்கும் (அழைப்பவருக்கும்)  அதைக் கேட்பவருக்கும் (அழைக்கப் படுபவருக்கும்) ஒரு மிகப் பெரிய ஆன்மீக அனுபவமாக அமைவதை நீங்கள் பார்க்கலாம்.

பாங்கு வாசகங்களின் பொருள்:

  1. அல்லாஹு அக்பர் - இறைவன் மிகப் பெரியவன் (நான்கு முறை)

(அல்லாஹ் என்றால் வணக்கத்திற்குத் தகுதிவாய்ந்த ஒரே இறைவன் என்பதை அறிவீர்கள்)

கீழ்கண்ட வாசகங்கள் ஒவ்வொன்றும் இருமுறை சொல்லப்படும்:

  1. அஷ்ஹது  அன் லா இலாஹ இல்லல்லாஹ் -  வணக்கத்திற்கும் கீழ்ப்படிதலுக்கும் தகுதியானவன் அல்லாஹ்வைத் தவிர வேறு யாரும் இல்லை என்று நான் சாட்சி கூறுகிறேன்.
  2. அஷ்ஹது அன்ன முஹம்மதுர் ரசூலுல்லாஹ் - முஹம்மது இறைவனின் இறுதித்தூதர் என்று நான் சாட்சி கூறுகிறேன்
  3. ஹய்யா அல்-ஸலாஹ் - தொழுகைக்கு வாருங்கள்
  4. ஹய்யா அல் ஃபலாஹ் - வெற்றிக்கு வாருங்கள்
  5. அல்லாஹு அக்பர் – இறைவன் மிகப்பெரியவன்.
  6. லா இலாஹ இல்லல்லாஹ்- வணக்கத்திற்குத் தகுதிவாய்ந்தவன் அல்லாஹ் மட்டுமே. – (இந்த வாசகம் ஒரு முறை மட்டுமே சொல்லப்படும்)

பாங்கின் முக்கியத்துவம்:

பாங்கின் முக்கியத்துவம் அறிய சமூகத்தில் தொழுகையை நிலைநாட்டுவதன் அவசியம் பற்றி அறிவது நலம்.

இந்த உலக வாழ்க்கை என்பது ஒரு பரீட்சை என்றும் இவ்வுலகம் அதற்கான பரீட்சைக் கூடம் என்றும் இஸ்லாம் கற்பிக்கிறது. இதில் இறைவனுக்குக் கட்டுப்பட்டு வாழ்பவர்களுக்கு இந்த உலக வாழ்கையும் அமைதிகரமாக அமைகிறது. மறுமையில் அவர்களுக்கு சொர்க்கமும் பரிசாகக் கிடைக்கிறது. இதை மறுப்பவர்களுக்கு இவ்வுலகில் அமைதியின்மையும் மறுமையில் நரகமும் வாய்க்கிறது என்பது இஸ்லாமிய போதனை.

அந்த வகையில் இஸ்லாத்தைப் பின்பற்றி வாழ முற்படுபவர்களுக்கு இறைவன் ஐந்து வேளைத் தொழுகைகளைக் கடமையாக்கி உள்ளான். அந்தத் தொழுகைகளை முடிந்தவரையில் கூட்டாக நிறைவேற்றவும் இஸ்லாம் பரிந்துரைக்கிறது. இதன்மூலம் தனிநபர் வாழ்விலும் சமூக வாழ்விலும் பற்பல  நன்மைகள் உண்டாகின்றன.

  1. தனி நபர்களை ஆன்மீக அடிப்படையில் ஒழுக்கமும் கட்டுப்பாடும் பேணுபவர்களாக ஆக்குகின்றன.
  2. நேரக்கட்டுப்பாடு (punctuality) உணர்வுடன் அன்றாட வாழ்க்கை நிகழ்வுகளை முன்னதாகவே திட்டமிட முடிகிறது.
  3. கூட்டாகத் தொழும்போது சகோதரத்துவ மற்றும் சமத்துவ உணர்வு வலிமையாகத் தூண்டப்படுவதால் தீண்டாமை நிறபேதம், இனபேதம் மொழி பேதம் போன்றவை அடியோடு ஒழிகின்றன.
  4. சமூகத்தில் ஏழைகளும் பணக்காரர்களும் அன்றாடம் ஓரணியில் சங்கமிப்பதால் ஏழைகளின் துயர் துடைப்பு, இன்ன பிற நலத்திட்டங்கள் செயல்பாட்டுக்கு வருகின்றன.
  5. தொழுகை பேணும் சமூகம் உருவாகும்போது மது, சூதாட்டம் போன்ற சமூகத் தீமைகள் அங்கு வேரூன்ற விடாமல் தடுக்கப்படுகின்றன.
  6.  இவைபோக குழந்தைகளுக்கு மார்க்கக் கல்வி, நீதிபோதனை போன்றவற்றை வழங்கும் மதரசாக்கள் பள்ளிவாசல் வளாகத்திலேயே செயல்படுகின்றன. பள்ளிவாசல் இமாம்கள் இக்கல்வி வழங்கும் பணியில் ஈடுபடுத்தப் படுகிறார்கள். இதன் மூலம் இளைய தலைமுறை ஒழுக்கம் பேணி வளர வாய்ப்பாகிறது.

இன்னும் இவை போன்ற ஆன்மீக மற்றும் சமூக சீர்திருத்த நடவடிக்கைகளுக்கு தொழுகை ஆணிவேராகத் திகழ்வதை நீங்கள் காணலாம். அந்தத் தொழுகைகளை முறைப்படி அந்தந்த நேரங்களில் நிறைவேற்ற சமூகத்திற்கு விடுக்கப்படும் அழைப்பே இந்த பாங்கு. இந்த பாங்கின் வாசகங்கள் மூலம் இறைவனின் மகத்துவம், இஸ்லாத்தின் கொள்கைப் பிரகடன வாசகங்கள், தொழுகையே வாழ்கையின் உண்மை வெற்றிக்கான வழி போன்ற உண்மைகள் அவ்வப்போது சமூகத்திற்கு நினைவூட்டப்படுகின்றன.

========================== 

அல்லாஹ் என்றால் யார்?
இஸ்லாம் ஏன் எதிர்ப்புக்குள்ளாகிறது?
ஒப்பிலா உயர்மறை திருக்குர்ஆன்!

வியாழன், 12 மே, 2022

மீண்டும் கஷ்டங்களை அனுபவிக்கத் தயார்!


from the group AMERICAN MUSLIMS a Muslim Sister writes

அமெரிக்க முஸ்லிம்கள் என்ற குழுவிலிருந்து ஒரு முஸ்லிம் சகோதரி எழுதுகிறார்...
நான் ஸ்வீடனைச் சேர்ந்தவள்... நான் இஸ்லாத்தை ஏற்றுக்கொண்டேன்
இஸ்லாமை நோக்கிய எனது பயணம் எளியது அல்ல. அது வலியும் வேதனையும் நிரம்பியது. பல தடைகளைக் கடந்து இஸ்லாத்திற்கு வந்துள்ளேன். ஆனால், நான் இத்தடைகளை மீண்டும் கடக்க வேண்டி வருமென்றால் மீண்டும் அனைத்தையும் கடக்கத் தயார் என்பதை தயக்கமில்லாமல் சொல்வேன்! அந்த அளவுக்கு நான் இஸ்லாத்தை நான் உறுதியாக நம்புகிறேன். இந்தப் பொக்கிஷத்தை நான் இழப்பதற்கு தயார் இல்லை!
என் வளர்ப்பும் குழந்தைப் பருவமும்:
நான் ஒரு கிறிஸ்தவ குடும்பத்தில் வளர்ந்தேன். அவர்கள் மிகவும் இனவெறியர்களாக இருந்தார்கள். அந்நிய இனத்தவர்களின் எதையும், எவரையும் அவர்கள் வெறுத்தார்கள். குறிப்பாக முஸ்லிம்களைக் கண்டாலே ஆகாது. நான் குழந்தையாக இருந்தபோது டிவியில் ஏதேனும் முஸ்லீம் தோன்றும் போதெல்லாம் டிவியை நோக்கி என் தந்தை காறி துப்பியது எனக்கு ஞாபகம் இருக்கிறது.
என் பெற்றோர்கள் என்னையும் என்னையும் என் சகோதரிகளையும் வெறுப்புடனேயே வரத்தார்கள். மது மற்றும் போதை வெறியில் வெளிப்படும் கோபத்தை எல்லாம் எங்கள் மீதே காட்டி தீர்த்துக் கொள்வார்கள். பெண்குழந்தைகளையும் வெறுத்தே வந்தார்கள் போலும். வளரும் பருவத்தில் அன்பு பாசம் என்றால் என்ன என்றே தெரியாமல் வளர்ந்தோம். ஒரு பெற்றோரின் அன்பையும் அக்கறையும் என்றும் உணர்ந்ததே இல்லை. எனக்கு தெரிந்ததெல்லாம் பயம் மற்றும் வலிகள் மட்டுமே.
தேவாலய சேர்க்கை:
நான் 14 வயதில் தேவாலயத்தில் சேர்க்கைக்காக நடத்தப்படும் கிறிஸ்தவ உறுதிப்படுத்தல் - Christian confirmation at church- ( சடங்குக்கான என் முறை வந்தது. அதற்காக நான் நிறைய படிக்கவும் ஆராயவும் வேண்டியிருந்தது. அப்போதுதான் எனக்குள் பல கேள்விகள் எழுந்தன. கடவுள் எப்படி மூன்றாக இருக்க முடியும்? எப்படி ஒருவருள் கடவுளும், குமாரனும், பரிசுத்த ஆவியும் இருக்க முடியும்?

அதில் எந்த அர்த்தமும் இருப்பதாகத் தெரியவில்லை. நான் பாதிரியார்களிடம் கேட்டேன், யாராலும் ஏற்றுக்கொள்ளத்தக்க விளக்கத்தை அளிக்க முடியவில்லை. அதனால் நானே உண்மையை தேட ஆரம்பித்தேன். நூலகத்தில் நான் நிறைய புத்தகங்கள் வாசித்தேன். சுயமாக ஆராய்ச்சிகள் மேற்கொண்டேன்.
கிறிஸ்தவம் பற்றிய புரிதல்கள்:
இன்றைய துருக்கியில் உள்ள நிகேயாவில ஒரு தேவாலயக் கூட்டத்தில் முதல் சபை, முழு வேதத்தையும் பைபிளையும் மாற்றிவிட்ட விஷயத்தை நான் அறிந்துகொண்டேன். அது மனிதர்களின் கைகளால் அவர்களுடைய சொந்த ஆசைகள் மற்றும் நம்பிக்கைகளின்படி ஒன்று சேர்க்கப்பட்ட ஒன்று என்ற விவரம் எனக்கு கிடைத்தது.
பேரரசர் கான்ஸ்டன்டைனால் (emperor Constantine) நடத்தப்பட்ட அந்த கூட்டத்தில் இயேசு தீர்க்கதரிசி அல்ல, அவர் கடவுளின் குமாரன் என்றும் பரிசுத்த ஆவி என்றும் முடிவு செய்யப்பட்டது. இயேசுவை தீர்க்கதரிசி என்றும் ஒரு மனிதன் என்றும் விவரித்த ஒவ்வொரு வேதநூலும் அழிக்கப்பட்டது.

எனவே இதைக் கண்டறிந்த பிறகு நான் என் மனதில் உறுதி கொண்டேன். நான் இனி ஒரு கிறிஸ்தவப் பெண்ணாக இருக்கப்போவதில்லை என்று முடிவு செய்தேன். மனிதர்களால் உருவாக்கப்பட்ட மதத்தை நான் நம்ப மறுத்தேன். ஒரு பேரரசரை திருப்திப்படுத்த ஒன்று சேர்க்கப்பட்ட ஒன்றை நான் எப்படி நம்புவது?
உண்மையைத் தேடுதல்:
எனவே பிறகு நான் உண்மையைத் தேட ஆரம்பித்தேன். கடவுள் கண்டிப்பாக இருக்கிறார் என்பது எனக்குத் தெரியும், எங்கோ இருக்க வேண்டும் என்பதை என் மனம் உறுதியாக நம்பியது.
அப்போது முதல் நான் வெவ்வேறு மதங்களைப் பற்றிய ஆய்வை மேற்கொண்டேன். பின்னர் நான் ஸ்வீடிஷ் மொழிபெயர்ப்பில் திருக்குர்ஆனைக் கண்டேன். அதை நான் முழுமையாகப் படித்தேன். அது என் கேள்விகள் அனைத்திற்கும் பதிலளித்தது மற்றும் அதைவிட அதிகமாக. திருக்குர்ஆனில் உள்ள அறிவும் அற்புதங்களும் என்னை அழ வைத்தன. நான் படித்து முடித்த பிறகு கடவுளின் முன் என் "ஷஹாதா"வை (கொள்கைப் பிரகடனம்) மொழிந்தேன். அப்போது எனக்கு வயது 17. ஆனால் அது பலத்த சோதனைகளைக் கொண்டுவரும் என்பதை நான் அறிந்திருக்கவில்லை!
சத்திய சோதனைகள்:
நான் முஸ்லிம் ஆகிவிட்ட தகவல் அறிந்ததும் என் குடும்பத்தார் பைத்தியம் பிடித்ததைப் போல் ஆகிவிட்டார்கள். என்னை மிக மோசமாக அடித்து துன்புறுத்தினார்கள். என் குடும்ப வீட்டை விட்டு என்னை வெளியேற்றினார்கள் அன்றிலிருந்து நானாகவே என்னை கவனித்துக் கொள்ள வேண்டியிருந்தது. பத்து வருடமாக என் குடும்பமும் நண்பர்களும் என்னிடம் பேசவில்லை. அவர்களைப் பொறுத்தவரையில் நான் இறந்து விட்டேன். அவர்கள் பார்வையில் நான் ஒரு துரோகி!

நான் இப்போது என் உடல் முழுவதும் உள்ள வடுக்களையும் நிரந்தர காயங்களையும் பார்க்கும்போது, நான் புன்னகைக்கிறேன், ஏனெனில் அவை மதிப்பு மிக்கவை. அனுபவித்த கஷ்டங்கள் எதற்காகவும் நான் வருத்தப்படவில்லை. மீண்டும் நான் அவற்றைக் கடந்து செல்ல வேண்டும் என்ற ஒரு நிலை வந்தால், மீண்டும் அனைத்தையும் செய்வேன்.
ஆம், நான் சத்தியத்தை அறிந்து கொண்டேன். இறைவன் என்னோடு இருக்கிறான். எனக்கு எப்போதும் தேவை அதுதானே!
------------------
இஸ்லாம் என்றால் என்னமுஸ்லிம் என்றால் யார்?
அல்லாஹ் என்றால் யார்?
இஸ்லாம் ஏன் எதிர்ப்புக்குள்ளாகிறது?
ஒப்பிலா உயர்மறை திருக்குர்ஆன்!

சனி, 23 ஏப்ரல், 2022

திருக்குர்ஆன் நற்செய்திமலர் 2022 மே மாத இதழ்



திருக்குர்ஆன் நற்செய்திமலர் 2022  மே மாத இதழ்  

பொருளடக்கம்:
இருள் மறைத்தது ஆனால் இறைவன் வெளிப்படுத்தினான்! -2
வாசகர் எண்ணம் -3
பிறர் குறைகளை துருவித் துருவி ஆராயாதீர்கள்! -4
அறிவியல் பற்றிய அறிவுபூர்வமான அணுகுமுறை -7
அறிவியல் அணுகுமுறையை (The scientific Method) உலகுக்குத் தந்த அரபு முஸ்லிம்கள் -10
திருக்குர்ஆன் மற்றும் நபிமொழிகளில் செவிப்புலன்! -12
அக்னோஸ்டிக் ஒருவரின் பயணம் -13
செவிப்புலனுக்கு ஏனிந்த முக்கியத்துவம்? -18
இறைவனை உணரத்தான் எத்தனை எத்தனை சான்றுகள்! -21 21
இறைவனை உணராத புலன்கள் இருந்தென்ன லாபம்? -22
ஜகாத் வழங்காதிருப்பது பாவம் -23
ஜகாத் மூலம் அச்சமற்ற வாழ்வு! -24
-------------------------------- 

இந்த இதழ் உங்கள் இல்லம் தேடிவர உங்கள் முகவரியை 9886001357 என்ற எண்ணுக்கு SMS செய்யுங்கள் 

இறைவன் ஏன் செவிப்புலனை முதன்மைப் படுத்துகிறான்?


பொதுவாகவே இறைவன் மனிதனுக்கு வழங்கிய மாபெரும் பொக்கிஷம் அவனது உடல். தெருவோரத்தில் சமூகத்தால் புறக்கணிக்கப்பட்ட எளியோர் ஆயினும் சரி, மனநலம் குன்றி சமூகத்தின் பரிகாசத்துக்கு ஆளாகும் மனிதர்களும் சரி, உடல் என்ற பொக்கிஷத்தைப் பொறுத்தவரை கோடீஸ்வரர்களே! அந்த அளவுக்கு நம் உடலின் ஒவ்வொரு உறுப்புக்களும் புலன்களும் மதிப்பு மிக்கவை.

பொதுவாகவே ஐம்புலன்களைப் பற்றிப் பேசும் போது மக்கள் அனைவரும் பார்வைப் புலனையே- அதாவது கண்களையே- மிக்க மதிப்பு மிக்கதாக முன்னிலைப்படுத்தி பேசுவதை நாம் அறிவோம்.  ஆனால் நம்மைப் படைத்தவன் பார்வைப் புலனைவிட செவிப்புலனை முதன்மைப்படுத்தி கூறுவதை நாம் திருக்குர்ஆனில் காணலாம். இதில் மிகப்பெரிய சூட்சுமம் இருப்பதை நீங்கள் காணலாம். திருக்குர்ஆன் நம்மைப் படைத்தவனின் வேதமே என்பதற்கு இதுவும் ஒரு சான்று.

கீழ்க்கண்ட வசனங்களை படித்து விட்டு தொடரும் அறிவியல் உண்மைகளை கவனியுங்கள்..

= இன்னும் அவனே உங்களுக்குச் செவிப்புலன்களையும், பார்வைப் புலன்களையும், இதயங்களையும் படைத்தவன்; மிகக் குறைவாகவே அவனுக்கு நீங்கள் நன்றி செலுத்துகிறீர்கள். (திருக்குர்ஆன் : 23:78)

= உங்களுக்கு வானத்திலிருந்தும், பூமியிலிருந்தும் உணவளிப்பவன் யார்? (உங்கள்) செவிப்புலன் மீதும், பார்வைகளின் மீதும் சக்தியுடையவன் யார்? இறந்தவற்றிலிருந்து உயிருள்ளவற்றையும், உயிருள்ளவற்றிலிருந்து இறந்தவற்றையும் வெளிப்படுத்துபவன் யார்? (அகிலங்களின் அனைத்துக்) காரியங்களையும் திட்டமிட்டுச் செயல்படுத்துபவன் யார்?” என்று(நபியே!) நீர் கேளும். உடனே அவர்கள் அல்லாஹ்என பதிலளிப்பார்கள்; “அவ்வாறாயின் அவனிடம் நீங்கள் பயபக்தியுடன் இருக்க வேண்டாமா?” என்று நீர் கேட்பீராக. (திருக்குர்ஆன்: 10:31)
(அல்லாஹ் என்றால் வணக்கத்திற்குத் தகுதிவாய்ந்த ஒரே இறைவன் என்பது பொருள்)
= உங்கள் மாதாக்களின் வயிறுகளிலிருந்து நீங்கள் ஒன்றுமே அறியாதவர்களாக இருந்த நிலையில் உங்களை அல்லாஹ் வெளிப்படுத்துகிறான்; அன்றியும் உங்களுக்குச் செவிப்புலன்களையும், பார்வைப் புலன்களையும், இதயங்களையும் - நீங்கள் நன்றி செலுத்தும் பொருட்டு - அவனே அமைத்தான். (திருக்குர்ஆன் : 16:78)


செவிப்புலன் செய்யும் முக்கியப் பணி:

காது அல்லது செவிப்புலன்களின் பணி ஒலி உணர்தல் மட்டுமல்ல. நம் உடலை சமநிலையில் வைத்திருத்தல் என்ற அதி முக்கியமான பணியும்தான். நம் கால்கள் தரையில் ஊன்றி நிற்பதற்குக் காரணம், நம் காதுதான். மனிதன் மயங்கி சரிந்து விடாமல் மொத்த உடல் அமைப்பையும் சமநிலைப்படுத்த உதவுவது செவிப்புலன்தான்.

ஒரு இறந்துபோன சடலத்தை நாம் செங்குத்தாக நிறுத்தவோ அல்லது உட்காரவோ வைக்க முடியுமா சிந்தித்துப்பாருங்கள். ஒரு சைக்கிளை நாம் அதன் சக்கரங்களின் மீது நிறுத்தி வைக்கவும் ஒரு ஸ்டான்ட் இல்லாமல் ஆகாது. ஆனால் ஒரு உயிருள்ள மனிதனால் நிற்கவும் குனியவும் குதிக்கவும் எல்லாம் முடிகிறது என்றால் அதற்குக் காரணம் செவிப்புலனில் அமைந்துள்ள புலன் உணர்வுக்கான கட்டமைப்புதான். மட்டுமல்ல, அவனால் கயிற்றின் மீது நடத்தல், உயரத்திலிருந்து நீருக்குள் குதித்தல், நீந்துதல் போன்ற சாகசங்களையும் நிகழ்த்த முடிகிறது. இந்தப் புலன் உணர்வை equilibrioreception என்கிறார்கள்.

உடல் எந்த வாட்டத்தில் இருக்கிறது என்பதைக் கொண்டு தன்னைத்தானே சமநிலைப் படுத்திக்கொள்வது இதன் மூலம்தான். கண்பார்வை , தசைகளின் இறுக்கம் அல்லது தளர்வு நிலை இதைத்தவிர , உடலின் பிரத்தியேக சென்சார் நம் செவிப்புலனில்தான் உள்ளது.  அந்த சென்சார் தரும் உள்ளீட்டை , பார்வை மற்றும் தசைகளின் நிலை இவற்றோடு கோர்த்துப்பார்த்து மூளை புரிந்துகொள்கிறது. செவிப்புலனில் அமைந்துள்ள காக்லியா (cochlea) திரவம் இதில் முக்கிய பங்கு வகிக்கிறது.

இப்போது யோசித்துப்பாருங்கள், செவிப்புலன் இப்பணியைச் செய்யாவிட்டால் என்ன நடக்கும் என்று. பார்வை இல்லாமல்கூட உயிர் வாழ்ந்து விடலாம். ஆனால் மேற்படி சமநிலை தவறிய மனிதனால் எவ்வளவு நாள் வாழ்ந்திட முடியும்? யோசியுங்கள். 

ஒலி உணரும் பணி:

ஒலி அலைகளை காது மடல்கள் உள்வாங்கி காக்லியாவை அதிர்வடைய வைத்து அந்த அலைகள் பல ஆயிரம் வழிகளில் அலைந்து திரிந்து மைக்ரோ நொடியில் உங்க மூளைக்கு சத்தங்களை உணர வைக்கிறது.

காதின் மடல்கள் அல்லது சோனைகள் மிக அற்புதமான வடிவம் கொண்டது,. மண்ணெண்ணெய் அடுப்பில் புனல் வைக்காமல், அப்படியே எண்ணெயை ஊற்றினால் எப்படி சிதறி போகும். அதே போன்றுதான், காது மடல்கள். இல்லாவிடில், ஒலி அலைகள் நேரடியாக மண்டைக்குள் மோதி, அதுவே நம்மை கொன்று விடும் அளவுக்கு வலுவானவை. அதைத்தான், காது மடல்களும் அதை சுற்றியுள்ள சிக்கலான அமைப்புகளும வடிகட்டும் வேலையை செய்கின்றன.

இனி படைத்தவன் கூறும் வார்த்தைகளுக்கு செவி சாய்ப்போம் வாருங்கள்:

= திடமாக, நாம் மனிதனை மிகவும் அழகிய அமைப்பில் படைத்தோம். (திருக்குர்ஆன் 95:4)

 = (பின்னர் ஆண், பெண்) கலப்பான இந்திரியத் துளியிலிருந்து நிச்சயமாக மனிதனை நாமே படைத்தோம் - அவனை நாம் சோதிப்பதற்காக அவனைக் கேட்பவனாகவும், பார்ப்பவனாகவும் ஆக்கினோம். (திருக்குர்ஆன் 76:2) 

மேற்படி வசனத்திலும் இறைவன் செவிப்புலனை முதன்மைப்படுத்தி இருப்பதை கவனியுங்கள். ஆம், இந்த செவிப்புலனும் பார்வைப் புலனும் நமக்கு வழங்கப்பட்டு இருப்பது முக்கியமாக இந்தக் குறுகிய வாழ்க்கை என்ற பரீட்சையை செவ்வனே நிறைவேற்றுவதற்காகவே. இந்தப் பரீட்சையின் நோக்கம் என்ன?

ஒவ்வோர் ஆத்மாவும் மரணத்தைச் சுகித்தே ஆகவேண்டும்; அன்றியும் - இறுதித் தீர்ப்பு நாளில் தான், உங்க(ள் செய்கைக)ளுக்குரிய பிரதி பலன்கள் முழுமையாகக் கொடுக்கப்படும்; எனவே எவர் (நரக) நெருப்பிலிருந்து பாதுகாக்கப்பட்டுச் சுவர்க்கத்தில் பிரவேசிக்குமாறு செய்யப்படுகிறாரோ அவர் நிச்சயமாக வெற்றியடைந்து விட்டார்; இவ்வுலக வாழ்க்கை மயக்கத்தை அளிக்கவல்ல (அற்ப இன்பப்) பொருளேயன்றி வேறில்லை. (திருக்குர்ஆன் 3:185)
==================== 
இஸ்லாம் என்றால் என்னமுஸ்லிம் என்றால் யார்?
அல்லாஹ் என்றால் யார்?
இஸ்லாம் ஏன் எதிர்ப்புக்குள்ளாகிறது?
ஒப்பிலா உயர்மறை திருக்குர்ஆன்!

செவ்வாய், 19 ஏப்ரல், 2022

இஸ்லாத்திற்கே உரிய தனித்தன்மைகள்

இவ்வுலகைப் படைத்து பரிபாலித்து வரும் ஏக இறைவன் வகுத்து வழங்கும் வாழ்வியல் வழிமுறையே இஸ்லாம். ஏனைய மதங்களோடும் மனிதர்கள் உருவாக்கிய கொள்கைகளோடும் ஒப்பிடும்போது கீழ்கண்ட தனித்தன்மைகளை அது கொண்டிருப்பதை நீங்கள் காணலாம்:

1-இஸ்லாம் கடவுள் யார் என்பதற்கு எளிய மற்றும் தர்க்கரீதியான புரிதலை வழங்குகிறது - இஸ்லாத்தைப் பொறுத்தவரையில் கடவுள் அல்லது இறைவன் என்பவன் முழுமையானவன். - இறைவன் ஒரு மனிதரோ அல்லது மனிதனின் மகனோ அல்லது ஒரு கற்பனை உருவமோ சிலையோ அல்ல. மூன்றில் ஒன்றோ அல்லது ஒன்றில் மூன்றோ அல்ல. அவனது படைப்பினங்களைப் போல அல்லாமல் இறைவன் முற்றிலும் தனித்தன்மை வாய்ந்தவன். இறைவனின் இலக்கணம் பற்றி திருக்குர்ஆன் இவ்வாறு கூறுகிறது:
= சொல்வீராக: இறைவன் ஒருவனே, அவன் தேவைகள் அற்றவன் அவன் யாரையும் பெற்றேடுக்கவும் இல்லை. அவனையும் யாரும் பெற்றேடுக்கவும் இல்லை. அவனுக்கு நிகராக யாரும் எதுவும் இல்லை. (திருக்குர்ஆன் 112:1-4)

(அல்லாஹ் என்றால் வணக்கத்திற்குத் தகுதிவாய்ந்த ஒரேஇறைவன் என்பது பொருள்) 

2. சக மனிதன் சகோதரனே தனக்கு சரி சமமே என்பதை ஆணித்தரமாக பறை சாற்றி அதை உலகளாவ நடைமுறைப்படுத்தியும் வருகிறது இஸ்லாம்.  இனம், நிறம், இடம், மொழி அடிப்படையில் பிரிந்துகிடக்கும் மக்களை ஒன்றிணைக்கிறது இஸ்லாம்.  மனிதகுல ஒற்றுமைக்கும் சமத்துவத்துக்கும் பின்னால் உள்ள உறுதியான காரணத்தை  இவ்வாறு தெளிவுபடுத்தியுள்ளான் இறைவன்:

 மனிதர்களே! நிச்சயமாக நாம் உங்களை ஓர் ஆண், ஒரு பெண்ணிலிருந்தே படைத்தோம்; நீங்கள் ஒருவரை ஒருவர் அறிந்து கொள்ளும் பொருட்டு. பின்னர், உங்களைக் கிளைகளாகவும், கோத்திரங்களாகவும் ஆக்கினோம்; (ஆகவே) உங்களில் எவர் மிகவும் பயபக்தியுடையவராக இருக்கின்றாரோ, அவர்தாம் அல்லாஹ்விடத்தில், நிச்சயமாக மிக்க கண்ணியமானவர். நிச்சயமாக அல்லாஹ் நன்கறிபவன், (யாவற்றையும் சூழந்து) தெரிந்தவன். (திருக்குர்ஆன் 49:13)
3 -இஸ்லாத்தைப் பொறுத்தவரையில் இறைவனின் அனைத்து தூதர்களையும் ஏற்றுக்கொண்டாக வேண்டும். யாரையும் நம் மனோ இச்சைப் படி மறுப்பதற்கு இடமில்லை. உலகிற்கு அனுப்பப்பட்ட சுமார் 1,24,000 இறைத்தூதர்கள் அனைவரையும் நேசிக்கிறோம். அவர்களில் யாரையும் நாம் மறுக்க முடியாது. சில மதங்களில் உள்ளதுபோல - உதாரணமாக யூதர்கள் இயேசு மற்றும் முஹம்மது நபியை நிராகரிக்கிறார்கள் - மேலும் கிறித்துவத்தில் முஹம்மது நபியை ஏற்பதில்லை. ஆனால் இஸ்லாத்தைப் பொறுத்தவரை நாம் அனைவரையும் ஏற்றாக வேண்டும். அவர்களில் பாகுபாடு காட்டுதலும் கூடாது.
 (இறை) தூதர், தம் இறைவனிடமிருந்து தமக்கு அருளப்பெற்றதை நம்புகிறார்; (அவ்வாறே) இறை விசுவாசிகளும் (நம்புகின்றனர்; இவர்கள்) யாவரும் அல்லாஹ்வையும், அவனுடைய மலக்குகளையும், அவனுடைய வேதங்களையும், அவனுடைய தூதர்களையும் நம்புகிறார்கள்: “நாம் இறை தூதர்களில் எவர் ஒருவரையும் பிரித்து வேற்றுமை பாராட்டுவதில்லை; (திருக்குர்ஆன் 2:285)
4 -இஸ்லாத்தில் மனிதனுக்கும் இறைவனுக்கும் இடையே இடைத்தரகர் இல்லை -- இறைவனை நேரடியாக தொழலாம் - இடையில் ஒருவர் தேவை இல்லை என்று திட்டவட்டமாகக் கூறுகிறது இஸ்லாம்.
(நபியே!) என்னுடைய அடியார் என்னைப் பற்றி உம்மிடம் கேட்டால் நிச்சயமாக நான் அவர்களுக்கு மிகச் சமீபமாக உள்ளேன். என்னை அழைத்தால் அழைப்பவரின் அழைப்பிற்கு நான் பதிலளிக்கிறேன். அவர்கள் நேர்வழி பெறுவதற்காக என்னையே அழைக்கட்டும், என்னையே விசுவாசம் கொள்ளட்டும். (திருக்குர்ஆன் 2:186)
5 -ஏதேனும் தனிநபரின் பெயராலோ குழுவின் அல்லது இனத்தின் அல்லது நாட்டின் பெயராலோ அறியப்படாத மார்க்கம் இஸ்லாம். அது தன் பண்பின் பெயரால் அறியப்படுகிறது. இஸ்லாம் என்ற வார்த்தையின் பொருள் உண்மையான இறைவனுக்கு கீழ்படிதல் என்பதே. அவ்வாறு கீழ்படிந்து வாழ்பவரே முஸ்லிம் என்று அறியப்படுகிறார். இந்த அடிப்படையில் இறைவனுக்குக் கீழ்படியும் பண்பு யாரிடம் எல்லாம் இருக்கிறதோ, அவர்கள் எந்த இனத்தில் பிறந்திருந்தாலும் சரி, எம்மொழியில் பேசினாலும் சரி, உலகின் எந்த நாட்டில் இருந்தாலும் சரி... மட்டுமல்ல அவர்கள் எக்காலத்தில் வாழ்ந்திருந்தாலும் சரி, அனைவரும் முஸ்லிம்களே! இதுதான் எமக்கு இஸ்லாம் கற்றுத்தரும் பரந்த கண்ணோட்டமாகும்.
6- இஸ்லாத்தில் வழிபாடு என்பது வெறும் சடங்குகளைச் சார்ந்தது அல்ல. இறைவனுக்கு விருப்பமான எந்த ஒரு செயலும் இங்கு வழிபாடே! அனைத்து நல்ல செயல்களும் வழிபாடே. புன்னகை, வேலையில் அல்லது வியாபாரத்தில் நேர்மையாக இருத்தல், நல்ல வார்த்தை கூறுதல், வாழ்க்கைத் துணையை மென்மையாக நடத்துதல், பணியாட்களிடம் பண்போடு நடத்தல் என அனைத்தும் வழிபாடே! இவை அனைத்தும் கடவுளால் பெரிதும் வெகுமதி அளிக்கப்படுகிறது. மேலும் அதற்கு எதிரானவை - அதாவது இறைவனுக்கு விருப்பமில்லாத எந்த ஒரு செயலும் பாவமே. மக்களை தவறாக நடத்துதல், ஏமாற்றுவது, பொய் சொல்வது, அவதூறு பரப்புதல், அப்பாவி மக்களை காயப்படுத்துவது, சுற்றுச்சூழலுக்குத் தீங்கு விளைவிப்பது என அனைத்தும் பாவங்களில் சேரும்.  

  நற்செயல் என்பது உங்களுடைய முகங்களைக் கிழக்கு நோக்கியோ மேற்கு நோக்கியோ திருப்புவதல்ல! மாறாக அல்லாஹ்வையும், இறுதி நாளையும், வானவர்களையும், வேதங்களையும், நபிமார்களையும் ஒருவன் முழுமையாக நம்புவதும் மேலும் (அல்லாஹ்வின் மீதுள்ள நேசத்தின் காரணமாகத்) தமக்கு விருப்பமான பொருளை உறவினர்களுக்கும், அநாதைகளுக்கும், வறியவர்களுக்கும், வழிப்போக்கருக்கும், யாசிப்போருக்கும், அடிமைகளை மீட்பதற்கும் வழங்குவதும், மேலும் தொழுகையை நிலைநாட்டி, ஜகாத்தைக் கொடுத்து வருவதுமே நற்செயல்களாகும். மேலும், வாக்குறுதி அளித்தால் தம் வாக்குறுதிகளை நிறைவேற்றுபவர்களும், வறுமை மற்றும் துன்பங்களின் போதும் சத்தியத்திற்கும், அசத்தியத்திற்கும் நடக்கும் போராட்டத்தின் போதும் பொறுமையுடன் நிலைத்து இருப்பவர்களுமே புண்ணியவான்கள் ஆவர்! இவர்களே உண்மையாளர்கள்; மேலும் இவர்களே இறையச்ச முடையவர்கள்.( திருக்குர்ஆன் 2:177)

7. இறைவன் எப்போதும் மன்னிப்பவனாக இருக்கிறான். நீங்கள் எப்போதும் (மரணத்திற்கு முன்) மனந்திருந்தி உளமார மன்னிப்பு கேட்டால் அவன் உங்களை கோரிக்கையை ஏற்றுக்கொள்கிறான். பாவமன்னிப்பு கேட்டபின் மீண்டும் அந்தப் பாவத்திற்குத் திரும்பக் கூடாது. இதைத் தவிர பாவமன்னிப்புக்கு குறுக்கு வழிகள் இல்லை. இறைவனின் மன்னிப்பு பெறுவதற்காக எந்த விலையும் கொடுக்க வேண்டியதில்லை. எந்த மனிதரின் அல்லது இறைத்தூதரின் பெயரினாலோ, இரத்தத்தினாலோ இரட்சிப்பு உண்டாக வாய்ப்பில்லை என்கிறது.
8-இஸ்லாம் ஒரு வாழ்வியல் வழிமுறை - அது உங்கள் வாழ்க்கையில் சந்திக்கக்கூடிய ஒவ்வொரு துறையிலும் செயல்பாடுகள் ஒழுங்குள்ளதாக அமைக்க உதவுகிறது. உங்கள் வாழ்க்கையின் பிரச்சினைகளுக்கு தீர்வுகளும் தெய்வீக வழிகாட்டல்களும் இஸ்லாத்தில் கிடைக்கின்றன.
9--இஸ்லாத்தின் ஆதார நூல்கள் சேகரிக்கப்பட்டு பாதுகாக்கப்படும் விதமும் ஆச்சரியமானதே! வரலாற்றில் திருக்குர்ஆனைப் போல எந்த புத்தகமும் இவ்வளவு நேர்த்தியாகப் பாதுகாக்கப்படவில்லை. நபிகளாரின் காலம் தொட்டு இன்றுவரை கோடிக்கணக்கான மக்களால் மனப்பாடம் செய்யப்பட்டும் அடிக்கடி ஒதப்பட்டும் வரும் நூல் இதுபோல எதுவும் இல்லை. உலகம் முழுக்க அன்றுமுதல் இன்றுவரை ஒலிவடிவிலேயே சற்றும் மாற்றமில்லாமல் உலாவரும் ஒரே புத்தகமும் இதுதான்! இறைவனே இதன் பாதுகாப்பை உறுதி செய்கிறான்:
நிச்சயமாக நாம் தான் (நினைவூட்டும்) இவ்வேதத்தை (உம்மீது) இறக்கி வைத்தோம்; நிச்சயமாக நாமே அதன் பாதுகாவலனாகவும் இருக்கின்றோம் (திருக்குர்ஆன் 15:9)

திருக்குர்ஆனுக்கு அடுத்தபடியாக நபிகளாரின் வாழ்க்கை குறிப்புகளும் நபிமொழிகளும் அடங்கிய ஹதீஸ் தொகுப்பும் அறிவிப்பாளர் வரிசை உட்பட மிக நேர்த்தியாக ஆவணப்படுத்தப் பட்டு வருவதும் இஸ்லாத்தின் தனித்தன்மைகளில் ஒன்று.  

10-இஸ்லாம் மார்க்கம் ஆதாரங்கள் மற்றும் தர்க்கத்தின் (logic) அடிப்படையில் அமைந்தது. இஸ்லாம் அறிவில்லாமல் கண்மூடித்தனமாகப் பின்பற்றுவதைத் தடைசெய்கிறது மற்றும் அது உண்மையை அறிய நமது பகுத்தறிவை பயன்படுத்த நம்மை அழைக்கிறது,
 மேலும் அவர்கள் இந்தக் குர்ஆனை ஆராய்ந்து பார்க்க வேண்டாமா? அல்லது அவர்கள் இருதயங்கள் மீது பூட்டுப் போடப்பட்டு விட்டனவா? (திருக்குர்ஆன் 47:24)
11-இஸ்லாம் கற்பிக்கும் ஒழுக்க விழுமியங்கள் உயர்வானவை. நடைமுறை சாத்தியமானவை. அதனால் அவை வெற்று போதனைகளாக நில்லாமல் இஸ்லாமிய்ர்களால் பின்பற்றப்பட்டு வருகின்றன. உதாரணமாக மதுவிற்கு அடிமையாதல், கருக்கொலை, சிசுக்கொலை, வரதட்சணை, பாலியல் கொடுமைகள், ஜாதி மற்றும் தீண்டாமைக் கொடுமைகள் போன்றவற்றிலிருந்து இஸ்லாமிய நாடுகள் பாதுகாப்பு பெற்றிருப்பதை இங்கு குறிப்பிடலாம்.

12 - இஸ்லாம் கூறும் சொர்க்கம் என்பது ஒரு கற்பனையோ மாயையோ அல்ல. அல்லது வெறும் ஆன்மீக ரீதியிலான அனுபவமோ அல்ல. ஒரு உண்மையான உடல்ரீதியான வாழ்க்கையைத்தான் சொர்க்கத்தில் நீங்கள் அனுபவிக்க உள்ளீர்கள். உண்ணுதல், பருகுதல், இன்னும் இன்ன பிற இன்பங்களை குறைகளற்ற முறையில் திடகாத்திரமான உடலோடு அனுபவிக்கும் இடமே சொர்க்கம்.

------------------------------ 

அல்லாஹ் என்றால் யார்?
இஸ்லாம் ஏன் எதிர்ப்புக்குள்ளாகிறது?
ஒப்பிலா உயர்மறை திருக்குர்ஆன்!