இளைஞர்களை சீர்திருத்த இஸ்லாம் கூறும் வழிகள்!

 

வழிகேட்டுக்கான காரணங்கள்:

இளைஞர்கள் வழிகெடுவதற்கு பல காரணங்கள் இருந்தாலும் மிக முக்கியமாகக் கீழ்கண்டவற்றை நாம் கூறலாம்:

அ) கடவுள் மறுப்பு கலந்த கல்வி. ஒழுக்கம் பேணுவதற்கு அடிப்படையான கடவுள் கொள்கை, மறுமை, நீதி, நியாயம் போன்ற விழுமியங்கள் புறக்கணிப்பு. 

ஆ) தன்னைத் தட்டிக் கேட்கவோ தண்டிக்கவோ யாரும் இல்லை என்ற தைரியம் அம்மக்களிடையே பெருகி வருவது.

இ)  குற்றங்களைப் பற்றிய வெட்க உணர்வு மழுங்கி வருவது.  தீமைகளைக் காண்போர் அவற்றை சொல்லாலோ செயலாலோ தடுக்காமல் இருப்பது அத்தீமைகளுக்கு சமூக அங்கீகாரத்தைப் பெற்றுத் தருகிறது.

ஈ) சரி எது தவறு எது நியாயம் எது அநியாயம் எது என்பதை மக்கள் சொந்த மனோ இச்சைப்படி முடிவு செய்வதால் அவரவர் செய்யும் தவறுகளையும்  நியாப்படுத்தும் போக்கு. சட்டங்களில் ஓட்டைகள்.

சீர்திருத்த நடவடிக்கைகள்:

இளைஞர்களை சீர்திருத்த வேண்டுமானால் கீழ்கண்டவை நடைபெறவேண்டும்:

அ) முதற்கண் மனித மனங்களை சீர்திருத்த வேண்டும். அவற்றிற்கு வாழ்க்கையின் முக்கியமான உண்மைகளை உணர்த்தி அவற்றை நல்வழிப்படுத்த வேண்டும். 

ஆ) சீர்திருத்தக் கருத்துக்களை வெறும் போதனைகளோடு நிறுத்திவிடாமல் அன்றாட வாழ்வில் அவர்கள் அவற்றை நடைமுறைப்படுத்த வழிவகை செய்யவேண்டும். 

இ) அவ்வாறு திருந்துவோர் கட்டுப்பாட்டோடும் பொறுப்புணர்வோடும் வாழ்வதற்கு   ஒருவருக்கொருவர் உறுதுணையாக இயக்கமாக செயல்பட வேண்டும். சமூக உறவுகள் வலுப்பட வேண்டும்.

ஈ) சரி எது தவறு எது, பாவம் எது புண்ணியம் எது, நியாயம் எது அநியாயம் எது என்பவற்றை வரையறுக்கும் தெளிவான உறுதியான அளவுகோல் அல்லது சட்டங்கள் தேவை.  

உ) தீமைகள் மீண்டும் சமூகத்தில் ஊடுருவாமல் தடுக்க உரிய தடுப்பு நடவடிக்கைகளையும் மேற்கொள்ள வேண்டும்.

இவை அனைத்தையும் நம்மைப் படைத்த இறைவன் வழங்கும் வாழ்வியல் கொள்கையான இஸ்லாம் நிறைவு செய்வதை ஆராய்வோர் அறியமுடியும்.

இஸ்லாம் மேற்கொள்ளும் சீர்திருத்த நடவடிக்கைகள்:

மேலே குறிப்பிட்ட சீர்திருத்த நடவடிக்கைகளை இஸ்லாம் எவ்வாறு மேற்கொள்கிறது என்பதை ஒவ்வொன்றாகப் பாருங்கள்:

 அ) சிறுவயதிலிருந்தே இறைவேதம் திருக்குர்ஆன், மற்றும் நபிமொழிகள் மூலம் முறையான ஆன்மீகக் கல்வி வழங்கல். அதாவது இறைவனின் வல்லமை, உள்ளமை மற்றும் மறுமை வாழ்வு பற்றிய உண்மைகள் - பகுத்தறிவு பூர்வமாக இளைய உள்ளங்களில் விதைக்கப் படுகிறது. குறிப்பாக ஆங்காங்கே பள்ளிவாசல்களை ஒட்டிய மதரசாக்கள் மூலம் இது நடத்தப் படுகிறது.

ஆ) தொழுகை ஜகாத் போன்றவை இஸ்லாத்தில் கட்டாயக் கடமைகள். ஐவேளைத் தொழுகைகள் மூலம் கற்ற கல்வி அன்றாடம் நினைவூட்டப்படுவதால் சதா மனிதனுக்குள் இறை உணர்வு இருந்துகொண்டே இருக்கும். அதன் காரணமாக பாவச்செயல்களில் இருந்து தூரமாக்கப் படுகிறான். தொடர்ந்து இஸ்லாம் கற்பிக்கும் மறுமைக் கொள்கை மனிதனை ஜகாத், தானதர்மங்கள், பிறர் நலன் நாடுதல் போன்ற பல நற்செயல்களுக்கு தூண்டுபவையாக உள்ளன.

இ) மேற்படி தொழுகைகளை கூட்டாக நிறைவேற்ற இஸ்லாம் ஊக்குவிக்கிறது. இதன் மூலம் தொழுகையாளிகள் ஐவேளையும் பள்ளிவாசல்களில் அடிக்கடி சந்திப்பதும் நலன் விசாரிப்பதும் நட்பு பாராட்டுவதும் கூட்டுறவும் வழக்கமாக அமைந்து விடுகிறது. இதன் காரணமாக பாவங்களில் இருந்து மீண்டு திருந்திய வாழ்வு வாழ முற்படுபவர்கள் மீண்டும் பாவங்கள் பால் போகாதிருக்கும்படி பாதுகாக்கப் படுகிறார்கள்.

ஈ) இஸ்லாமிய வரைமுறைகள், சட்டங்கள் இறைவேதம் திருக்குர்ஆன் மற்றும் நபிமொழிகளை அடிப்படையாகக் கொண்டவை. மனிதர்கள் இயற்றும் சட்டங்களுக்கு உள்ள பலவீனங்கள் இவற்றுக்கு இல்லை.

உ) தீமைகள் சமூகத்தில் ஊடுருவாமல் இருக்க மது, போதைபொருள் உபயோகம், திருட்டு, விபச்சாரம், கொலை, போன்ற குற்றங்களுக்கு கடுமையான தண்டனைகளை அரசாங்கங்களுக்கு இஸ்லாம் பரிந்துரைக்கிறது. 

=================== 

இஸ்லாம் என்றால் என்ன? முஸ்லிம் என்றால் யார்?

http://quranmalar.blogspot.com/2012/10/blog-post_25.html

அல்லாஹ் என்றால் யார்?

http://quranmalar.blogspot.com/2012/10/blog-post_8.html

இஸ்லாம் ஏன் எதிர்ப்புக்குள்ளாகிறது?

http://quranmalar.blogspot.com/2012/11/blog-post_24.html

ஒப்பிலா உயர்மறை திருக்குர்ஆன்!

http://quranmalar.blogspot.com/2015/07/blog-post_25.html

இதைப் படிக்காவிட்டால் இழப்பு! பேரிழப்பு!

http://quranmalar.blogspot.com/2012/10/blog-post_31.html

நாம் ஏன் பிறந்தோம்?

http://quranmalar.blogspot.com/2014/05/blog-post_15.html

சமூக சீர்திருத்தத்தில் பாங்கோசையின் பங்கு

அல்லாஹு அக்பர்…அல்லாஹு அக்பர் 

அல்லாஹு அக்பர்…அல்லாஹு அக்பர் 

ஒரு நாளைக்கு ஐந்து முறை, உங்களுக்கு அருகிலுள்ள பள்ளிவாசல் ஒலிபெருக்கியில் இருந்து இந்த வார்த்தைகளைக் கேட்டிருப்பீர்கள். இதை அரபு மொழியில் அதான் என்பார்கள். தமிழ் இஸ்லாமிய வழக்கில் இது ‘பாங்கு’ என்று சொல்லப்படும். ஐவேளைத் தொழுகை இஸ்லாத்தில் கடமை என்பதையும் அவற்றை இஸ்லாமியர்கள் அந்தந்த நேரங்களில் ஆங்காங்கே உள்ள பள்ளிவாசல்களில் கூட்டாக நிறைவேற்றுவதையும் அறிவீர்கள். உண்மையில் அதான் அல்லது பாங்கு என்பது பள்ளிவாசலில் நடைபெற உள்ள அந்த நேரத் தொழுகைக்கான அழைப்பே.

அதான் எப்படி தொடங்கியது?

இறைவனின் இறுதித்தூதர் முஹம்மது நபி(ஸல்) அவர்களின் காலத்தில், தொழுகைக்கு மக்களை எப்படி அழைப்பது என்பது குறித்து தன் தோழர்களோடு கலந்தாலோசனை நடத்தினார்கள்.  நபித்தோழர்கள் பலரும் பல ஆலோசனைகளை முன்வைத்தார்கள்.  சிலர் மணி அடிக்க வேண்டும் என்றும், சிலர் சங்கு ஊதலாம் என்றும், சிலர் தீ மூட்டி மக்களை அழைக்கலாம் என்றும் ஆலோசனைகள் தந்தனர். இறைவனின் வழிகாட்டுதலைத் தொடர்ந்து நபிகளார்  “மனித குரலை” தொழுகைக்கான அழைப்பிற்கு  பயன்படுத்தத் தேர்ந்தெடுத்தார். 

நபிகளார் மனிதக் குரலை விட அதிக சத்தமாக ஒலிக்கும் மணியையோ, சங்கையோ அல்லது தூரத்தில் இருந்தே கண்ணிற்கு தெரியும் நெருப்பையோ தேர்ந்தெடுக்கவில்லை என்பதை நீங்கள் இங்கு கவனிக்கலாம். அவர்கள் ஏன் அப்படிச் செய்தார் என்று நீங்கள் கேட்கக்கூடும். மனிதக் குரல் மூலம் கொடுக்கப்படும் தொழுகைக்கான அழைப்பு என்பது அதைச் சொல்பவருக்கும் (அழைப்பவருக்கும்)  அதைக் கேட்பவருக்கும் (அழைக்கப் படுபவருக்கும்) ஒரு மிகப் பெரிய ஆன்மீக அனுபவமாக அமைவதை நீங்கள் பார்க்கலாம்.

பாங்கு வாசகங்களின் பொருள்:

1. அல்லாஹு அக்பர் - இறைவன் மிகப் பெரியவன் (நான்கு முறை)

(அல்லாஹ் என்றால் வணக்கத்திற்குத் தகுதிவாய்ந்த ஒரே இறைவன் என்பதை அறிவீர்கள்)

கீழ்கண்ட வாசகங்கள் ஒவ்வொன்றும் இருமுறை சொல்லப்படும்:

2. அஷ்ஹது  அன் லா இலாஹ இல்லல்லாஹ் -  வணக்கத்திற்கும் கீழ்ப்படிதலுக்கும் தகுதியானவன் அல்லாஹ்வைத் தவிர வேறு யாரும் இல்லை என்று நான் சாட்சி கூறுகிறேன்.
3. அஷ்ஹது அன்ன முஹம்மதுர் ரசூலுல்லாஹ் - முஹம்மது இறைவனின் இறுதித்தூதர் என்று நான் சாட்சி கூறுகிறேன்
4. ஹய்யா அல்-ஸலாஹ் - தொழுகைக்கு வாருங்கள்
5. ஹய்யா அல் ஃபலாஹ் - வெற்றிக்கு வாருங்கள்
6. அல்லாஹு அக்பர் – இறைவன் மிகப்பெரியவன்.
7. லா இலாஹ இல்லல்லாஹ்- வணக்கத்திற்குத் தகுதிவாய்ந்தவன் அல்லாஹ் மட்டுமே. – (இந்த வாசகம் ஒரு முறை மட்டுமே சொல்லப்படும்)

பாங்கின் முக்கியத்துவம்:

பாங்கின் முக்கியத்துவம் அறிய சமூகத்தில் தொழுகையை நிலைநாட்டுவதன் அவசியம் பற்றி அறிவது நலம்.

இந்த உலக வாழ்க்கை என்பது ஒரு பரீட்சை என்றும் இவ்வுலகம் அதற்கான பரீட்சைக் கூடம் என்றும் இஸ்லாம் கற்பிக்கிறது. இதில் இறைவனுக்குக் கட்டுப்பட்டு வாழ்பவர்களுக்கு இந்த உலக வாழ்கையும் அமைதிகரமாக அமைகிறது. மறுமையில் அவர்களுக்கு சொர்க்கமும் பரிசாகக் கிடைக்கிறது. இதை மறுப்பவர்களுக்கு இவ்வுலகில் அமைதியின்மையும் மறுமையில் நரகமும் வாய்க்கிறது என்பது இஸ்லாமிய போதனை.

அந்த வகையில் இஸ்லாத்தைப் பின்பற்றி வாழ முற்படுபவர்களுக்கு இறைவன் ஐந்து வேளைத் தொழுகைகளைக் கடமையாக்கி உள்ளான். அந்தத் தொழுகைகளை முடிந்தவரையில் கூட்டாக நிறைவேற்றவும் இஸ்லாம் பரிந்துரைக்கிறது. இதன்மூலம் தனிநபர் வாழ்விலும் சமூக வாழ்விலும் பற்பல  நன்மைகள் உண்டாகின்றன.

1. தனி நபர்களை ஆன்மீக அடிப்படையில் ஒழுக்கமும் கட்டுப்பாடும் பேணுபவர்களாக ஆக்குகின்றன.
2. நேரக்கட்டுப்பாடு (punctuality) உணர்வுடன் அன்றாட வாழ்க்கை நிகழ்வுகளை முன்னதாகவே திட்டமிட முடிகிறது.
3. கூட்டாகத் தொழும்போது சகோதரத்துவ மற்றும் சமத்துவ உணர்வு வலிமையாகத் தூண்டப்படுவதால் தீண்டாமை நிறபேதம், இனபேதம் மொழி பேதம் போன்றவை அடியோடு ஒழிகின்றன.
4. சமூகத்தில் ஏழைகளும் பணக்காரர்களும் அன்றாடம் ஓரணியில் சங்கமிப்பதால் ஏழைகளின் துயர் துடைப்பு, இன்ன பிற நலத்திட்டங்கள் செயல்பாட்டுக்கு வருகின்றன.
5. தொழுகை பேணும் சமூகம் உருவாகும்போது மது, சூதாட்டம் போன்ற சமூகத் தீமைகள் அங்கு வேரூன்ற விடாமல் தடுக்கப்படுகின்றன.
6.  இவைபோக குழந்தைகளுக்கு மார்க்கக் கல்வி, நீதிபோதனை போன்றவற்றை வழங்கும் மதரசாக்கள் பள்ளிவாசல் வளாகத்திலேயே செயல்படுகின்றன. பள்ளிவாசல் இமாம்கள் இக்கல்வி வழங்கும் பணியில் ஈடுபடுத்தப் படுகிறார்கள். இதன் மூலம் இளைய தலைமுறை ஒழுக்கம் பேணி வளர வாய்ப்பாகிறது.

இன்னும் இவை போன்ற ஆன்மீக மற்றும் சமூக சீர்திருத்த நடவடிக்கைகளுக்கு தொழுகை ஆணிவேராகத் திகழ்வதை நீங்கள் காணலாம். அந்தத் தொழுகைகளை முறைப்படி அந்தந்த நேரங்களில் நிறைவேற்ற சமூகத்திற்கு விடுக்கப்படும் அழைப்பே இந்த பாங்கு. இந்த பாங்கின் வாசகங்கள் மூலம் இறைவனின் மகத்துவம், இஸ்லாத்தின் கொள்கைப் பிரகடன வாசகங்கள், தொழுகையே வாழ்கையின் உண்மை வெற்றிக்கான வழி போன்ற உண்மைகள் அவ்வப்போது சமூகத்திற்கு நினைவூட்டப்படுகின்றன.

========================== 

அல்லாஹ் என்றால் யார்?

http://quranmalar.blogspot.com/2012/10/blog-post_8.html

இஸ்லாம் ஏன் எதிர்ப்புக்குள்ளாகிறது?

http://quranmalar.blogspot.com/2012/11/blog-post_24.html

ஒப்பிலா உயர்மறை திருக்குர்ஆன்!

http://quranmalar.blogspot.com/2015/07/blog-post_25.html

குற்றவாளிகள் தண்டனையை கேட்டுப் பெறும் அற்புதம்

நபிகளார் இஸ்லாம் கற்பிக்கும் தெளிவான ஏக இறைக் கொள்கையையும் மறுமை கோட்பாட்டையும் மக்களிடையே போதிக்க போதிக்க மக்கள் இவ்வுலக வாழ்வை மறுமை வாழ்வோடு இணைத்துப் பார்க்க ஆரம்பித்தார்கள். அதன் விளைவாக மக்கள் தாங்கள் வழக்கமாக மறைமுகமாகவும் வெளிப்படையாகவும் செய்து கொண்டிருந்த தீய செயல்களில் இருந்தும் பாவங்களில் இருந்தும் விலகி வாழ்ந்தார்கள். இறைவன் தன்னைக் கண்காணிக்கிறான், தங்களின் செயல்கள் பற்றி இறுதித்தீர்ப்பு நாளில் விசாரணையும் புண்ணியங்களுக்கு பரிசும் பாவங்களுக்கு தண்டனைகளும் வழங்கப்பட உள்ளன என்ற உணர்வு அவர்களை முழுமையாக ஆட்கொண்டது.

அப்படியே பாவங்கள் செய்தாலும் இறைவனிடம் பாவமன்னிப்பு கோரி அவற்றிலிருந்து மீண்டார்கள். ஆனால் பெரும்பாவங்களுக்கு பாவமன்னிப்பு கோருவதோடு அதற்காக இறைவன் விதித்துள்ள தண்டனைகளை இவ்வுலகிலேயே பெற்றால்தான் மறுமை தண்டனையில் இருந்து தப்பிக்க முடியும் என்றல்லவா இஸ்லாம் கூறுகிறது! உதாரணமாக திருட்டுக்கு கைவெட்டுதல், விபச்சாரத்திற்கு சாட்டையடி அல்லது கல்லெறி தண்டனை, கொலைக்குக் கொலை, உறுப்புக்கள் சிதைப்பவனுக்கு உறுப்பு சிதைதல் போன்ற தண்டனைகளை இஸ்லாம் அரசுக்கு பரிந்துரைக்கிறது. மறுமை தண்டனைகள் இவற்றைவிட மிகக் கடுமையானவை என்று திருக்குர்ஆனும் நபிமொழிகளும் எச்சரிக்கின்றன. உதாரணமாக..

= நிச்சயமாக நரகம் எதிர்பார்த்துக் கொண்டிருக்கின்றது, வரம்பு மீறிவர்களுக்குத் தங்குமிடமாக. அதில் அவர்கள் பல யுகங்களாகத் தங்கியிருக்கும் நிலையில். அவர்கள் அதில் குளிர்ச்சியையோ, குடிப்பையோ சுவைக்கமாட்டார்கள். கொதிக்கும் நீரையும் சீழையும் தவிர. (அதுதான் அவர்களுக்குத்) தக்க கூலியாகும். (திருக்குர்ஆன் 78:21-30.

= .....அநியாயக் காரர்களுக்கு (நரக) நெருப்பை நிச்சயமாக நாம் சித்தப்படுத்தியுள்ளோம்: (அந்நெருப்பின்) சுவர் அவர்களைச் சூழ்ந்து கொள்ளும்: அவர்கள் (தண்ணீர் கேட்டு) இரட்சிக்கத் தேடினால் உருக்கப்பட்ட செம்பு போன்ற தண்ணீரைக் கொண்டே இரட்சிக்கப்படுவார்கள். (அவர்களுடைய) முகங்களை அது சுட்டுக் கருக்கி விடும்.  மிகக் கேடான பானமாகும் அது! இன்னும், இறங்கும் தலத்தில் அதுவே மிகக் கெட்டதாகும். ‘ (திருக்குர்ஆன் 18:29)  

இந்நிலையில் பெரும் பாவங்கள் செய்தவர்கள் என்ன செய்தார்கள்? கீழ்கண்ட நிகழ்வு அதற்கான ஓர் உதாரணம்:

மனிதநேய நீதிபதியாக நபிகளார்

நபிகள் நாயகம் மதீனாவில் இறைத்தூதராக இருந்து அரசாட்சி செய்த காலகட்டம் அது.  

நபி (ஸல்) அவர்களின் திருச்சபையில் ‘மாயிஸ்’ என்ற தோழர் வந்து, தான் ஒரு பெண்ணுடன் தவறான முறையில் நடந்து கொண்டதாகச் சொன்னார். அவரின் சொல்லை நபிகளார் புறக்கணித்தவர்களாக இருந்தார்கள். எனவே அவர் மீண்டும் மீண்டும் சொன்னார். நான்கு தடவை சொல்லி முடித்தார். அப்பொழுதும் நபிகளார் எதுவும் பேசவில்லை.

ஐந்தாவது முறை அவர் சொல்லும்போது அவரிடம் ‘நீர் அவளுடன் உடலுறவு கொண்டீரா?’ என்று கேட்டார்கள்.

‘ஆம்!’ என்றார் அவர். 

‘உன்னில் நின்றும் ‘அது’ அவளின் நின்றும் ‘அதிலே’ மறையுமளவுக்கு நடந்தீரா?’ என்று மீண்டும் வினவினார்கள்.

மறுபடியும் ‘ஆம்!’ என்றார் அவர்.

அப்பொழுதும் அவரை குற்றவாளி என்று ஒப்ப நபி(ஸல்) அவர்களுக்கு மனம் வரவில்லை. மேலும் தொடர்ந்து பல கேள்விகள் கேட்டார்கள்.

‘சுர்மா புட்டியிலே சுர்மா குச்சி மறைவது போலவும், கிணற்றுக்குள்ளே கயிறு மறைவது போலவும் மறைந்ததா?’ என்று கேட்டார்கள்.

‘ஆம்!’ என்றே மறுபடியும் அவர் கூறினார்.

‘விபச்சாரம் என்றால் என்னவென்று தெரியுமா?’ என்று கேட்டவுடன், அவர் விஷயத்தை படு பயங்கரமாக வெளிப்படுத்த விரும்பியவராக, ‘ஆம்! ஓர் ஆண்மகன் தன் மனைவியுடன் ‘ஹலாலாக’(சட்டாபூர்வமாக அனுமதிக்கப்பட்ட முறையில்) நடந்து கொள்வானே அதே காரியத்தை அப்பெண்ணுடன் நான் ‘ஹராமாக’(சட்டவிரோதமாக) நடத்தி விட்டேன்’ என்றார்.

‘இவ்வாறு சொல்வதன் மூலம் உமது நோக்கம் யாது?’ என்று இறுதியாகக் கேட்டார்கள்.

‘(இக்குற்றத்திற்கான தண்டனையை நிறைவேற்றுவதன் வாயிலாக) என்னை தூய்மைப்படுத்திக் கொள்ள விரும்புகின்றேன்’ என்று அவர் பதிலளித்தார்.

தாம் செய்த குற்றத்தை தாமே மனமுவந்து விண்ணப்பித்து, தண்டனையை ஏற்றுக்கொள்ள முன்வந்து விட்ட பிறகு வேறு வழியின்றி அவருக்கு விபச்சாரத்திற்குரிய கல்லெறி தண்டனையை நிறைவேற்ற அண்ணலார் (ஸல்)அவர்கள் ஆணையிட்டார்கள். அதன்படி நிறைவேற்றப்பட்டது.

அறிவிப்பு: அபூஹுரைரா (அபூதாவூது)

கவனிக்க வேண்டிய குறிப்புகள்:

1.      இறைவனின் இறுதித் தூதர் என்ற முறையில் அவரது வாழ்க்கை நிகழ்வுகள் மனித குலத்திற்கு வாழ்க்கை முன்மாதிரியாக கற்பிக்கப் படவேண்டியவையாக உள்ளன. குறிப்பாக இந்த நிகழ்வில் ஒரு நீதிபதி எவ்வாறு வழக்கை விசாரிப்பது என்பதற்கும் மனம்திருந்தி வந்த குற்றவாளிகளோடு எவ்வாறு நடந்துகொள்வது என்பதற்கும் முன்மாதிரிகள் உள்ளன. எனவே அவை தெளிவான முறையில் பதிவு செய்யப்பட்டு நபிமொழித் தொகுப்புகளில் பாதுகாக்கப்பட்டு வருவதை நீங்கள் காணலாம். இது இறைவனின் ஏற்பாடு.

2.      மேற்படி சம்பவம் ஒரு மனிதரின் வாழ்வா சாவா என்பது தொடர்பானது. ஒரு நிரபராதி தண்டிக்கப் படக்கூடாது என்பதாலும் மனம் திருந்தி வந்த தோழரை எப்படியாவது மரண தண்டனையிலிருந்து காப்பாற்ற வேண்டும் என்ற தன் ஆர்வத்தாலும் கருணை நபிகளார் முழு விவரத்தையும் துருவித்துருவி விசாரித்ததை நாம் கவனிக்கலாம்.

3.      இனி சிலருக்கு இப்படியும் ஒரு சந்தேகம் எழலாம். ‘மனம்திருந்தி வந்த குற்றவாளியை மன்னித்து தண்டனையிலிருந்து நபிகளார் விலக்கு அளித்து இருக்கலாமே? ஏன் தண்டனையை நிறைவேற்ற வேண்டும்?’. இதற்கான விளக்கம் இதுதான்: பூமியில் மக்களிடையே ஒழுக்க வாழ்வை நிலைநாட்டுவதற்காக இறைவன் விதித்தவையே அவன் தரும் சட்டங்கள். அதை முன்னுதாரணமாக நின்று நடைமுறைப்படுத்தும் பொறுப்பு இறைத்தூதர் என்ற முறையில் நபிகளாருக்கு வழங்கப்பட்டு இருந்தது. ஒருவேளை நபிகளார் சுயவிருப்பத்தின் அடிப்படையில் விலக்கு அளித்திருந்தால் அதையே மேற்கோள்காட்டி பிற்கால தலைமுறையினர் விபச்சார குற்றவாளிகளை தண்டனையிலிருந்து விடுவித்து இருப்பார்கள். இறைசட்டங்கள் வீரியம் இழந்தவையாகி விபச்சாரக் குற்றங்கள் பெருக வாய்ப்பாகி விடும்.

-------------------------------------------